कल्याण : कल्याणमध्ये एका सहा महिन्याच्या मुलाच्या चोरीची धक्कादायक घटना समोर आली आहे. या प्रकरणी कल्याणच्या महात्मा फुले पोलिसांनी सीसीटीव्हीच्या मदतीने दोन आरोपींना बेड्या ठोकल्या आहेत. अंकीत प्रजापती आणि दिनेश सरोज असे दोन्ही आरोपींची नावे आहेत. दिनेश हा रिक्षा चालक आहे तर अंकित त्याचा मेहुना आहे. विशेष म्हणजे कल्याण रेल्वे स्टेशन परिसरात अशाप्रकारे बाळ चोरी होण्याची ही पहिलीच वेळ नाही. तर
याआधीदेखील असा प्रकार घडला आहे. पण पोलिसांनी नेहमीच बाळ शोधण्याची यशस्वी कर्तबगारी करुन दाखवली आहे. या दोघांनी फुटपाथवरून सहा महिन्याच्या बाळाची चोरी का केली? याबाबतचा तपास पोलिसांनी सुरू केला आहे.
पोलिसांनी दिलेल्या माहितीनुसार, कल्याण पश्चिमेत केडीएमसी बस स्टॉप शेजारी फुटपाथवर आयेशा समीर शेख नावाची महिला 6 महिन्याच्या बाळासोबत झोपली होती. या दरम्यान कोणीतरी अज्ञात व्यक्तीने अयोशा यांच्या सहा महिन्याच्या मुलाचं अपहरण केलं. या प्रकरणी आयशा शेख यांनी कल्याणच्या महात्मा फुले पोलीस ठाण्यात तक्रार दाखल केली. या गुन्ह्याचे गांभीर्य लक्षात घेवून वरिष्ठांचे मार्गदर्शनाखाली वपोनि शैलेश साळवी यांनी अज्ञात आरोपींचा शोध घेण्यासाठी 3 तपास पथके तयार केली होती.
पोलिसांनी आरोपींच्या आवळल्या मुसक्या
तपास पथकातील पोलीस अधिकारी आणि अंमलदार यांनी तांत्रिक माहिती, सीसीटीव्ही फुटेज आणि मिळालेल्या खात्रीशीर माहितीच्या आधारे सापळा रचला. अखेर पोलिसांना आरोपींच्या मुसक्या आवळण्यात यश आलं. पोलिसांनी दिनेश सरोज (वय 35), अंकीतकुमार प्रजापती (वय 25) या दोन्ही आरोपींना त्यांच्या राहत्या घरातून अटक केली. दोन्ही आरोपी उल्हासनगरला राहायला होते. पोलिसांनी आरोपीच्या राहत्या घरातून 6 महिन्याच्या बाळाची सुखरुप सुटका केली.
पोलिसांनी आरोपींच्या मुसक्या आवळल्यानंतर आरोपींनी आपला गुन्हा कबूल केला. दोघांपैकी एका आरोपीने आपल्या घरी बाळाला नेलं होतं. पोलिसांनी घटनेनंतर अवघ्या 12 तासात आरोपींना अटक केली. तसेच बाळाची सुखरुप सुटका केली. आरोपींनी गुन्हा करण्यासाठी वापरलेली ऑटो रिक्षा, मोबाईल फोन सर्व गोष्टी पोलिसांनी ताब्यात घेतल्या आहे.
