Shirur News : शिरूर : वडनेर (ता. शिरूर) येथे आताउल्ला उर्फ मोईन शाबीर खान (रा. मुंबई, वय – २२) या तरूणाचा धारदार हत्यार आणि कुऱ्हाडीच्या घावाने हल्ला करून खून करण्यात आला. सात खोल्यांचे दरवाजे बंद करून सर्वांत आतील खोलीत कुऱ्हाडीने मानेवर वार केले.
शाहिद शरीफ बागवान असे घटनेतील आरोपीचे नाव आहे. घटनेची माहिती मिळताच पोलीस घटनास्थळी पोहचले. ही घटना गुरूवारी (ता. २४) सायंकाळी सात वाजता घडली. पोलिसांनी तातडीने आरोपीचा मागोवा घेतल्याची माहिती मिळत आहे.
या घटनेबाबत मिळालेल्या अधिक माहितीनुसार, वडनेर फाकटे रोडवर, वडनेर हद्दीत जाकीर सय्यत (रा. मुंबई) यांनी वर्षभरापूर्वी जमीन घेतली आहे. देखभालीसाठी त्याचाच नातेवाईक असलेला मृत आताउल्ला उर्फ मोईन वडनेर येथे रहात होता.
त्याच्याकडे कामाला असलेला शाहिद शरीफ बागवान (रा. भुसावळ, जि. जळगाव) त्याच्यासोबत रहात होता. खून करण्यापूर्वी शाहिद याने रहात असलेल्या ठिकाणच्या सात खोल्यांचे दरवाजे बंद करून सर्वांत आतील खोलीत कुऱ्हाडीने मानेवर वार केले. त्यानंतर त्याने तेथून पलायन केले.
दरम्यान, या घटनेची माहिती मिळताच शिरूरचे पोलीस निरीक्षक अमोल जगताप यांच्या मार्गदर्शनाखाली सहाय्यक पोलीस निरीक्षक अमोल पन्हाळकर, पोलीस उपनिरीक्षक सुनील उगले, पोलीस अमंलदार दीपक पवार यांनी घटनास्थळी धाव घेतली.
