Shirur News शिरूर, (पुणे) : घराच्या बाहेर राखण करणाऱ्या एका कुत्र्यावर बिबट्याने हल्ला केल्याची घटना घडली. तळेगाव ढमढेरे (ता. शिरूर) येथे शनिवारी (ता. २९) मध्यरात्री अडीच वाजण्याच्या सुमारास ही घटना घडली. बिबट्याच्या या हल्ल्याचा प्रकार सीसीटीव्हीमध्ये कैद झाला आहे.
मिळालेल्या माहितीनुसार…!
तळेगाव ढमढेरे परिसरात भीमाशेत, चौधरी वस्ती, ढमढेरे वस्ती या लोकवस्तीत सलग तीन दिवस तीन ठिकाणी नागरिकांना बिबट्याचे दर्शन झाले. रात्रीच्या वेळी हा बिबट्या शिकारीच्या शोधात बाहेर पडत आहे. येथील शेतकरी बाळासाहेब ढमढेरे यांच्या पाळीव कुत्र्यावर हल्ला करून बिबट्याने त्याला ठार केले. आता पुन्हा एकदा पहाटेच्या सुमारास पुन्हा दुसऱ्या कुत्र्यावर हल्ला केला. यावेळी कुत्र्याने मोठा आवाज केल्याने घरात असलेले लोक बाहेर आल्याने बिबट्याने घटनास्थळावरून जोरात धूम ठोकली आणि सदर कुत्रा थोडक्यात बचावला.
या भागात ऊसशेती मोठ्या प्रमाणात असल्याने हा बिबट्या दिवसभर आरामासाठी ऊसाचा आसरा घेतो. त्याचबरोबर रानात भटकणाऱ्या पाळीव कुत्री ,रानडुक्कर आणि इतर प्राण्यांची शिकार करून उदरनिर्वाह करतो. परंतु एप्रिल-मे महिन्याच्या दरम्यान ऊस कमी झाल्याने बिबट्या मानवी वस्तीत प्रवेश करू लागला आहे. शेतात काम करणाऱ्यांना वारंवार बिबट्याचं दर्शन होत आहे.
दरम्यान, बिबट्याच्या भीतीने शेतात काम करण्यासाठी मजूर नकार देत असल्याने शेतकरी वर्ग चिंताग्रस्त झाला आहे. जीवितहानी होण्याच्या आधी वनविभागाने लवकरात लवकर बिबट्याचा बंदोबस्त करावा, अशी मागणी शिरुर तालुक्यातील नागरिकांकडून केली जात आहे .
अधिक बातम्या वाचण्यासाठी येथे क्लिक करा….!
Shirur News | पंधरा वित्त आयोगातील मंजूर कामे पुर्ण न झाल्याने उपोषणाचा इशारा
