पुणे : पिंपरी चिंचवड शहरात राहणाऱ्या एका २६ वर्षीय बीएमएस महिला डॉक्टरला लग्नाचे आमिष दाखवून एकाने बलात्कार केल्याची घटना नुकतीच उघडकीस आली आहे. याप्रकरणी २६ वर्षीय पीडित महिलेने गुरुवारी (ता. २५) पिंपरी पोलीस ठाण्यात फिर्याद दिली होती.
अजिम नुरमहंमद तांबोळी (वय-३१ रा. संत तुकाराम नगर, पिंपरी) असे गुन्हा दाखल करून बेड्या ठोकलेल्या आरोपीचे नाव आहे. सदरचा प्रकार २०१९ पासून ऑगस्टपर्यत सुरु होता.
पोलिसांनी दिलेल्या माहितीनुसार, पीडित महिला ही बीएमएस डॉक्टर आहे. तर आरोपी हा सेल्स मॅनेजर म्हणून काम करतो. आरोपीने प्रेमाचे नाटक करुन फिर्यादीला लग्नाचे आमिष दाखवले. तसेच फिर्यादी राहत असलेल्या घरी येऊन वारंवार शारीरिक संबंध ठेवले. फिर्यादी यांनी लग्नाबाबत विचारणा केली असता आरोपीने त्यांना शिवीगाळ करुन बेदम मारहाण केली. तसेच घरामध्ये डांबून ठेवत घराला बाहेरुन कुलुप लावले. पोलिसांत तक्रार केली तर जीवे मारण्याची धमकी दिली.
दरम्यान २२ ऑगस्ट रोजी फिर्यादी या त्यांच्या क्लिनीकमध्ये गेल्या होत्या. त्यावेळी आरोपीने त्याच्याकडे असलेल्या घराच्या चावीने घरात प्रवेश केला. त्याने घरातील सामान अस्तव्यस्त फेकून देऊन घरातील वस्तूंची तोडफोड केल्याचे फिर्यादीत नमूद केले आहे. पुढील तपास सहायक पोलीस निरीक्षक अतुल शेटे करीत आहेत.
