दौंड : दौंड शहरातुन एक मोठी बातमी समोर आली आहे. येथे गोपाळवाडी परिसरातील नागरी वस्तीतील कचऱ्यात, बरण्यांमध्ये अर्भक आणि मानवी अवयव टाकून दिल्याचे तपासात समोर आले होते. हे बरण्यांमधील अर्भक आणि मानवी अवयव दौंड येथील भंगाळे रुग्णालयाचे असल्याचे निष्पन्न झाले होते. आता या प्रकरणी पुणे जिल्हा शल्यचिकित्सकांनी भंगाळे रूग्णालयाची नोंदणी रद्द करण्याचे आदेश दिले असून यासंदर्भाची नोटीस संबंधित रुग्णालयास बजावण्यात आली आहे.
मिळालेल्या माहितीनुसार, दौंड-कुरकुंभ राष्ट्रीय महामार्गालगत असलेल्या जिजामाता नगर येथे प्लास्टिक बरण्यांमध्ये एक १८ ते २० आठवडे वय असलेले पुरुष जातीचे मृत अर्भक २५ एप्रिल रोजी आढळून आले होते. तसेच शस्त्रक्रिया दरम्यान काढलेले गर्भाशय, स्तन, वृषण, आदी मानवी अवयव सबंधितांच्या नावासह बरण्यांमध्ये आढळले होते. शहरातील दौंड-सिध्दटेक अष्टविनायक मार्गावरील भंगाळे क्लिनिक अॅण्ड नर्सिंग होम या रुग्णालय आहे. आढळलेले मानवी अवयव आणि अर्भक हे या रुग्णालयाचे असल्याची माहिती दौंड पोलिसांच्या तपासात समोर आली होती.
हा धक्कादायक प्रकार उघडकीस आल्यानंतर जिल्हा शल्यचिकित्सक डॉ. एन. एस. यमपल्ले यांनी या रुग्णालयास भेट दिली. तेंव्हा या प्रकरणी गंभीर त्रुटी आढळून आल्या होत्या. भंगाळे रुग्णालयास नोटीस बजावून त्याबाबत खुलासा मागविण्यात आला होता. रुग्णालयाने केलेला खुलासा असमाधानकारक असल्याचे आदेशात म्हटले आहे.
दरम्यान, रुग्णालय प्रशासन व व्यवस्थापनाकडून शरीरशास्त्र कायदा १९४९, वैद्यकीय गर्भपात कायदा १९७१ व बॉम्बे नर्सिंग होम अक्ट १९४९ चा भंग झाल्याचे आढळून आले होते. त्यानुषंगाने रुग्णालयाची बॉम्बे नर्सिंग होम अॅक्ट आणि वैद्यकीय गर्भपाताची कायद्याने झालेली रुग्णालयाची नोंदणी २१ मे रोजी रद्द करण्यात आली आहे. असे डॉ. एन. एस. यमपल्ले यांनी त्यांच्या आदेशात म्हटले आहे. याबरोबरच यापुढे भंगाळे रुग्णालयाने आंतररुग्ण भरती करु नयेत, असे देखील सदर आदेशात नमूद करण्यात आले आहे. रुग्णालयाच्या व्यवस्थापकांना तशी नोटीसही बजावण्यात आली आहे.
