Pune News : पुणे, ता. ०७ : हप्ता देण्यास नकार देणार्‍या दुकानदाराला टोळक्यांनी मारहाण करून मदतीला धावलेल्या ३ तरुणांनाही मारहाण केल्याची घटना घडली आहे. याबाबत भारती विद्यापीठ पोलिसांनी खूनाचा प्रयत्न केल्याचा गुन्हा दाखल करुन तिघांना अटक केली आहे.
तिघांना अटक
याबाबत अमता श्रीनिवास शिंदे (वय ४८, रा. जांभुळवाडी रोड, शनिनगर, आंबेगाव) यांनी भारती विद्यापीठ पोलीस ठाण्यात फिर्याद दिली आहे. त्यानुसार पोलिसांनी आकाश कांबळे, प्रविण गुडे, अभिषेक भगुरे यांना अटक केली आहे. तर विनोद सोमवंशी, भूषण भांडवलकर, जावेद शेख, तुषार कचेकर, आदित्य नाईक, गोविंदे लोखंडे, तेजस ऊर्फ राम वाडेकर, सुरज बांदल, राहुल शिरसाठ, मृणाल जाधव व इतर २ ते ३ यांच्यावर गुन्हा दाखल केला आहे.
पोलिसांनी दिलेल्या माहितीनुसार, हे टोळके शनिनगर परिसरात दहशत पसरवून दुकानदारांकडून हप्ते वसुल करीत असते. विनोद सोमवंशी याच्या सांगण्यावरुन भूषण भांडवलकर व जावेद शेख हे श्री गणेश सुपर मार्केटचे ताराराम देवाशी यांच्याकडे हप्ता मारण्यासाठी आले होते. त्यावेळी त्यांनी पैसे देण्यास नकार दिला.
तेव्हा त्यांनी शिवीगाळ केली. यावेळी ते दोघेजण इतरांना घेऊन आले. त्यांनी ताराराम यांना मारहाण केली.तेव्हा ताराराम यांच्या मदतीला फिर्यादी यांचा मुलगा रोहित गेला असता आरोपींनी त्याला तुला आता खल्लासच करणार असे म्हणून त्याच्या डोक्यात वार करुन जखमी केले.
दरम्यान, या टोळक्याने शिंदे यांचा पुतण्या वेंदात शिंदे, रोहितचा मेव्हाणा प्रविण अंकुश यांना मारहाण करुन दरवाजे व खिडक्यांवर दगड मारुन तोडफोड केली. पोलीस उपनिरीक्षक कळमकर तपास करीत आहेत.
