Pune Accident News : पुणे : पुरंदर तालुक्यातील परिंचे ते सासवड रस्त्यावर अपघातांचे प्रमाण वाढले आहे. दोन दुचाकींची समोरासमोर धडक होऊन झालेल्या भीषण अपघातात दोघांचा दोघांना जीव गमवावा लागला असून, तिघे गंभीर जखमी झाले आहेत.
संजय जयसिंग नानगुडे (वय २६, रा. परिंचे) आणि चंद्रकांत संपत दानवले (वय ५०, रा. सटलवाडी, ता. पुरंदर) अशी मृत्यू पावलेल्या व्यक्तींची नावे आहेत. तर शेखर दशरथ घोडके (वय २५), प्रतिक अनिल खोमणे (वय २५, दोघेही रा. परिंचे) आणि आकाश रोहिदास समगीर (वय २४, रा. वीर, सर्वजण ता. पुरंदर) हे जखमी झाले आहेत. त्यांच्यावर रुग्णालयात उपचार सुरू आहेत.
याबाबत सासवड पोलिसांनी दिलेल्या माहितीनुसार, या भीषण अपघातात मृत्यूमुखी पडलेले चंद्रकांत संपत दानवले हे शुक्रवारी (ता. ३) सायंकाळी त्यांच्या ताब्यातील स्प्लेंडर मोटारसायकलवरून (क्र. एमएच १२, जेपी ९४८९) परिंचेकडून सटलवाडी येथे निघाले होते. तर संजय जयसिंग नानगुडे हे त्यांच्याकडील अॅक्टीव्हावरून (गाडी क्रमांक एम एच १२ इएक्स ०५३२) सटलवाडीकडून येत असताना शिवतारेवस्ती ते पोलदराच्या दरम्यान दोन्ही दुचाकींची समोरासमोर धडक झाली.
दुचाकींची धडक एवढी भीषण होती की, अपघातानंतर दोन्ही दुचाकी दूरवर फेकल्या गेल्या. यामुळे चंद्रकांत दानवले आणि संजय नानगुडे या दोघांनाही गंभीर दुखापत झाली. जखमेतून मोठ्या प्रमाणात रक्तस्त्राव झाल्यामुळे त्यांचा जागीच मृत्यू झाला. तसेच एका दुचाकीवरील इतर तिघे गंभीर जखमी झाले.
याबाबत सासवडचे पोलीस निरीक्षक संतोष जाधव यांच्या मार्गदर्शनाखाली सहायक फौजदार अनिल खोमणे पुढील तपास करीत आहेत.
