Gram Panchayat Election 2023 : पुणे : राज्यात सुमारे २५ हजार जागांसाठी आज मतदान होत आहे. मतदानाला राज्यभर सुरुवात झाली असून, उपमुख्यमंत्री अजित पवार यांच्या मातोश्री आशाताई पवार आणि पत्नी सुनेत्रा पवार यांनी काटेवाडी मतदान केंद्रावर जाऊन मतदानाचा हक्क बजावला. त्यानंतर माध्यमांशी संवाद साधताना मातोश्री आशाताई पवार भावूक झाल्या. लोकांचे भरभरुन प्रेम मिळाले आहे. बारामतीमधील जनताही आमच्यासोबत आहेत. आता माझे वय ८६ वर्षे आहे. लोकांनाही वाटते अजित पवार यांनी मुख्यमंत्री व्हावे. माझ्या देखतच दादाने राज्याचे मुख्यमंत्री व्हावे, हीच माझी सुद्धा इच्छा आहे, अशी अपेक्षा त्यांनी व्यक्त केली.
राज्यातील ग्रामपंचायतीसाठी आज सकाळपासून मतदानास सुरुवात झाली. अजित पवार यांचे गाव असलेल्या काटेवाडीत अजित पवार यांच्या मातोश्री आशाताई पवार आणि अजित पवार यांच्या पत्नी सुनेत्रा पवार यांनी मतदान केले. काटेवाडी ग्रामपंचायतीवर अजित पवार यांचे वर्चस्व राहिले आहे. परंतु या वर्चस्वाला आता सत्तेत एकत्र असलेल्या भाजपकडून आव्हान दिले आहे. परंतु गावातील लोक आपल्यासोबतच आहेत, आमचा विजय निश्चित आहे, असे आशाताई पवार यांनी सांगितले.
अजित पवार यांना डेंग्यू झाला आहे. डॉक्टरांनी त्यांना विश्रांतीचा सल्ला दिला आहे. त्यांना अशक्तपणा आला आहे. त्यामुळे ते मतदानासाठी येऊ शकले नाहीत. १९५७ सालापासून मी मतदान करतेय. सुरुवातीला काटेवाडी गावात काहीच नव्हते. पण माझ्या सुनेमुळे काटेवाडीत भरपूर बदल झाले आहेत. सूनबाईने गावासाठी काम केले. गावात आमचा विजय निश्चित आहे, असे आशाताई पवार यांनी सांगितले.
काटेवाडीत १६ जागांसाठी मतदानाला होत आहे. गावात एकूण ५ हजार जण मतदानाचा हक्क बजावणार आहेत. मतदानाला सुरुवात झाली आहे. सकाळपासून मतदान केंद्रावर मतदानासाठी मोठी गर्दी झाली आहे. यंदा अजित पवार यांच्या पॅनेलसमोर भाजपने आव्हान उभे केले आहे. आता त्यात कोण बाजी मारणार? हे सोमवारीच स्पष्ट होणार आहे. सरपंचपदासाठी दोन्ही पक्षाच्या पॅनलमध्ये थेट निवडणूक होत आहे.
राज्यातील २३५३ ग्रामपंचायतींसाठी आज मतदान होत आहे. यापैकी काही ग्रामपंचायतींच्या निवडणुका या बिनविरोध झाल्या आहेत. त्याची नक्की आकडेवारी उपलब्ध नव्हती. पण २३५३ ग्रामपंचायतींमध्ये एकूण २०,५७२ जागा आहेत. या सर्व २३५३ ग्रामपंचायतींमध्ये सरपंचपदाचीही थेट निवडणूक होत आहे. याशिवाय २०६८ ग्रामपंचायतींमधील रिक्त २९५० जागांसाठी पोटनिवडणूक आजच होणार आहे. रिक्त असलेल्या १३० सरपंचपदासाठीही पोटनिवडणूक होत आहे. अशा पद्धतीने सुमारे २५ हजार जागांसाठी रविवारी मतदान होईल. नक्षलग्रस्त भाग वगळता राज्यातील अन्य ग्रामपंचायतींच्या निवडणुकांची मतमोजणी सोमवारी होईल. तर नक्षलग्रस्त भागांमध्ये मंगळवारी मतमोजणी होणार आहे.
निवडणुका होत असलेल्या ग्रामपंचायती : २३५३
एकूण जागा : २०,५७२
सरपंचपदे : २३५३
पोटनिवडणुका : ३०८०
संरपंच पोटनिवडणूक : १३०
