पंढरपूर : Pandharpur News – घराला अचानक तब्बल ३० ते ३५ फुटाचा खड्डा पडून त्या खड्ड्यात एकापाठोपाठ ३ महिला पडल्याची धक्कादायक घटना पंढरपूर (Pandharpur) शहरातील कोळी गल्ली परिसरात मंगळवारी (ता.२८) दुपारी दोनच्या सुमारास घडली आहे. सुदैवाने आजूबाजूच्या नागरिकांनी प्रसंगावधान दाखवत साडीच्या गाठी बांधत तिन्ही महिलांना सुखरूप बाहेर काढले आहे. (Pandharpur News)
पंढरपूर शहरातील कोळी गल्लीतील राहुल शिंदे यांच्या घराला पडला खड्डा
मिळालेल्या माहितीनुसार, पंढरपूर शहरातील कोळी गल्ली परिसरातील राहुल शिंदे राहतात. मंगळवारी दुपारी दोनच्या सुमारास त्यांच्या घरातील फरशी खाली आली. राहुल यांच्या कुटुंबातील एक महिला या खड्ड्यात पडल्यानंतर ती ओरडू लागली. तिच्या ओरडण्याने शेजारील एक महिला काय झालं आहे, हे पाहण्यासाठी आली. आणि तिलाही या खड्ड्याचा अंदाज न आल्याने तीदेखील खाली पडली. राहुल शिंदे यांची वृद्ध आई देखील या खड्ड्यात पडली. तीन महिला एकापाठोपाठ खड्ड्यात पडल्याने कोळी गल्लीत एकच गोंधळ उडाला होता.
आजूबाजूच्या नागरिकांनी प्रसंगावधान दाखवून या खड्ड्यात उतरले आणि त्यांनी साड्यांच्या गाठी बांधत या महिलांना खड्ड्यातून बाहेर काढले. या खोल खड्ड्यात महिला पडल्या तेथे पाणी होते, वरून दगड-माती पडत असल्याने त्यांना तातडीने वाचवणे गरजेचे होते. अशातच स्थानिक नागरिकांनी धाडस दाखवत या खोल खड्ड्यात उतरून महिलांना बाहेर काढले. खड्ड्यातून बाहेर काढल्यानंतर या तिन्ही महिलांना उपचारासाठी उपजिल्हा रुग्णालय पंढरपूर दाखल करण्यात आले आहे.
दरम्यान, पावसाळ्यात पंढरपूर शहरात नदीचे पाणी शिरते. वारंवार येणाऱ्या पुरामुळे या ठिकाणची जमीन गाळाची व भुसभुशीत बनल्याने असे खड्डे पडत असल्याचा अंदाज नागरिक व्यक्त करत होते. सुदैवाने ही घटना मंगळवारी दिवसा घडल्याने त्यांना तात्काळ मदत मिळाली. रात्री झोपेत असताना ही घटना घडली असती तर मोठा अनर्थ घडला असता. पंढरपूर शहरातील अशा धोकादायक झालेल्या इमारतींची तपासणी प्रशासनाने हाती घेणे गरजेचे आहे. अशी मागणी नागरिकांनी केली आहे. कारण पंढरपुरातील अशा अनेक घरांमध्ये वारकरी वास्तव्याला उतरतात, त्यामुळे एखादी मोठी दुर्घटना होऊ शकते.
