दौंड, (पुणे) : दौंड पोलीस स्टेशनच्या हद्दीत बेकायदेशीर अग्निशस्त्र बाळगणाऱ्या एका इसमाला पोलिसांनी अटक केली आहे. खडकी (ता. दौंड) येथील शिवाजी महाराज चौक परिसरात ही कारवाई करण्यात आली. बुधवारी (ता. 22) दौंड गुन्हे शोध पथकाने हि कारवाई केली आहे.
वैभव संजय शिंदे (रा. खडकी, ता. दौंड) असे अग्निशस्त्र बाळगणाऱ्या इसमाचे नाव आहे. त्याच्याकडून पोलिसांनी एक देशी बनावटीचे पिस्तुल आणि जिवंत काडतुसे असा 53 हजार रुपये किमतीचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, बुधवारी दौंड पोलीस स्टेशनचे पोलीस निरीक्षक गोपाळ पवार यांना गुप्त बातमीदारामार्फत माहिती मिळाली की, खडकी येथील शिवाजी महाराज चौक परिसरात वैभव शिंदे हा तरुण संशयास्पद हालचाली करत असून, त्याच्याकडे बेकायदेशीर शस्त्र असल्याची माहिती पोलिसांना मिळाली होती.
मिळालेल्या माहितीची खातरजमा करून पोलीस निरीक्षकांच्या मार्गदर्शनाखाली दौंड गुन्हे शोध पथकाने तात्काळ घटनास्थळी धाव घेतली. पोलिसांनी संशयित आरोपी वैभव शिंदे याला ताब्यात घेऊन त्याची अंगझडती घेतली असता, त्याच्याकडे एक देशी बनावटीचे पिस्तुल व तीन जिवंत काडतुसे असा एकूण 53 हजार रुपये किमतीचा मुद्देमाल मिळून आला.
पोलिसांनी हा सर्व माल जप्त केला असून आरोपीने हे शस्त्र अवैधरित्या खरेदी केल्याची कबुली दिली आहे. याप्रकरणी आरोपी वैभव शिंदे याच्याविरुद्ध भारतीय शस्त्र कायदा कलम 3/25 प्रमाणे गुन्हा दाखल करण्यात आला असून, त्याला अटक करण्यात आली आहे. हे शस्त्र त्याने कोणाकडून खरेदी केले आणि त्याचा काय उद्देश होता, याचा पुढील तपास पोलीस करत आहेत.
ही कारवाई वरिष्ठांच्या मार्गदर्शनाखाली पोलीस निरीक्षक गोपाळ पवार, पोलीस उपनिरीक्षक रुपेश कदम, पोलीस हवालदार नितीन बोराडे, सुभाष राऊत, अमीर शेख, निखिल जाधव, किरण पांढरे, पोलीस कॉन्स्टेबल पवन माने, संजय कोठावळे आणि नितीन दोडमिसे यांच्या पथकाने केली.
