फुरसुंगी, ता. ३ : विवाहानंतर माहेरहून पैसे आणण्यासाठी दबाव, गर्भपात करण्यास भाग पाडण्याचा प्रयत्न, मारहाण, शिवीगाळ आणि पतीचे दुसऱ्या महिलेसोबत कथित प्रेमसंबंध यामुळे विवाहितेचा शारीरिक व मानसिक छळ केल्याप्रकरणी फुरसुंगी पोलिसांनी पती, सासू, सासरे आणि दिराविरुद्ध गुन्हा दाखल केला आहे.
आकाश रामदास शिंदे, सविता रामदास शिंदे, रामदास शिंदे आणि अजिंक्य रामदास शिंदे असे गुन्हा दाखल करण्यात आलेल्यांची नावे आहेत. याप्रकरणी वडकी येथील एका 22 वर्षीय विवाहितेने फुरसुंगी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, नोव्हेंबर २०२२ मध्ये फिर्यादी यांचा आकाश रामदास शिंदे याच्याशी दोन्ही कुटुंबांच्या संमतीने विवाह झाला. लग्नानंतर काही दिवस गावी वास्तव्यानंतर दाम्पत्य हडपसर येथील उन्नतीनगर परिसरात राहू लागले. सुरुवातीला सर्व काही सुरळीत असले, तरी पुढे शिक्षणाचा खर्च, घरखर्च आणि इतर कारणांवरून माहेरहून पैसे आणण्याचा तगादा सुरू झाला, असा आरोप फिर्यादीत करण्यात आला आहे.
फिर्यादीच्या म्हणण्यानुसार, बी.कॉम.च्या शिक्षणासाठी प्रवेश घ्यायचा असताना सासरच्या मंडळींकडून “तुझ्या शिक्षणाचा खर्च माहेरच्यांनीच करावा” असे सांगण्यात आले. त्यानंतर सातत्याने माहेरहून पैसे आणण्यासाठी दबाव टाकण्यात येत होता. ऑक्टोबर २०२५ मध्ये आपण गरोदर असल्याची माहिती पतीला दिल्यानंतर त्याने “हे बाळ मला नको आहे, गर्भपात करून टाक,” असा दबाव टाकल्याचा आरोपही फिर्यादीत करण्यात आला आहे.
त्यानंतर पती घर सोडून निघून गेला आणि त्याचा दुसऱ्या महिलेसोबत संबंध असल्याचा संशय निर्माण झाल्याचे फिर्यादीने नमूद केले आहे. डिसेंबर २०२५ मध्ये पती घरी आल्यानंतर त्याच्या मोबाईलवर एका महिलेचा फोन आल्याने विचारणा केल्यावर त्याने मारहाण करून मोबाईल फोडल्याचा आरोप आहे. याप्रकरणी हडपसर पोलीस ठाण्यात तक्रार दिल्यानंतर पतीने संबंधित महिलेशी संबंध ठेवणार नसल्याचे लेखी आश्वासन दिले होते. मात्र, त्यानंतरही तो पुन्हा घर सोडून गेला आणि ज्योत्स्ना बाबासाहेब स्वामी नावाच्या महिलेसोबत प्रेमसंबंध असल्याचे सांगून घरी परतण्यास नकार दिल्याचा दावा फिर्यादीने केला आहे.
दरम्यान, गरोदरपणातही सासरच्या मंडळींकडून हॉस्पिटलचा खर्च आणि घरखर्चासाठी माहेरहून पैसे आणण्याची मागणी होत असल्याचे तसेच विरोध केल्यास शिवीगाळ व मारहाण केली जात असल्याचा आरोप आहे. मार्च २०२६ मध्ये सात महिन्यांची गरोदर असताना सासऱ्यांनी ढकलून दिल्याने आपण माहेरी परतल्याचे फिर्यादीत नमूद करण्यात आले आहे.
मे २०२६ मध्ये मुलगी झाल्यानंतरही पतीने “माझा तुझ्याशी आणि मुलीशी काहीही संबंध नाही” असे सांगितल्याचा, तसेच नंतर दुसऱ्या महिलेशी लग्न केल्याचा दावा करून धमकी दिल्याचाही आरोप फिर्यादीने केला आहे. या तक्रारीच्या आधारे फुरसुंगी पोलिसांनी आकाश रामदास शिंदे, सविता रामदास शिंदे, रामदास शिंदे आणि अजिंक्य रामदास शिंदे यांच्याविरुद्ध विवाहितेचा छळ, मारहाण, पैशांची मागणी आणि अन्य संबंधित कलमान्वये गुन्हा दाखल केला असून पुढील तपास सुरू आहे.
