पुणे : गेल्या 8 वर्षांपासून प्रेक्षकांचे निखळ मनोरंजन करणारा लोकप्रिय शो ‘महाराष्ट्राची हास्यजत्रा’ सध्या एका वेगळ्याच कारणामुळे चर्चेत आला आहे. या कार्यक्रमाचे लेखक आणि दिग्दर्शक सचिन गोस्वामी यांनी सोशल मीडियावर एक पोस्ट शेअर करत आपला तीव्र संताप व्यक्त केला आहे.
काही यूट्यूब चॅनेल्सकडून कार्यक्रमाचे व्हिडिओ वापरून त्यासोबत अत्यंत अश्लील आणि आक्षेपार्ह थंबनेल्स जोडले जात असल्याचा धक्कादायक प्रकार समोर आला आहे. या संपूर्ण प्रकाराला सचिन गोस्वामी यांनी ‘विकृतीचा कळस’ असे म्हटले आहे.
सचिन गोस्वामी यांनी आपल्या पोस्टमध्ये लिहिले आहे की, “महाराष्ट्राची हास्यजत्रा हा कार्यक्रम सोनी मराठी वाहिनीवर यशस्वीपणे सुरू असून लवकरच याचे 1000 भाग पूर्ण होत आहेत. जगभरातील मराठी प्रेक्षकांचे या शोला भरभरून प्रेम मिळत आहे. सध्या अधिकृत प्लॅटफॉर्म्ससोबतच अनेक अनधिकृत यूट्यूब पोर्टल्सवरही या शोचे व्हिडिओ दाखवले जात आहेत. हे लोक या कंटेंटच्या जोरावर पैसे तर कमवत आहेतच, पण त्यासोबतच अत्यंत घाणेरडी कॅप्शन्स आणि अश्लील थंबनेल्स वापरून कार्यक्रमाची नाहक बदनामी करत आहेत.”
ज्या कंटेंटमुळे आपले पोट भरते, त्याचीच अशी बदनामी करताना संबंधित लोकांना लाज वाटत नाही का, असा संतप्त सवाल त्यांनी उपस्थित केला आहे. हा प्रकार अत्यंत क्लेशदायक असल्याचे त्यांनी म्हटले आहे.
या गैरप्रकारामुळे प्रेक्षकांनी कार्यक्रमाच्या दर्जावर शंका घेऊ नये, असे आवाहनही त्यांनी केले आहे. आम्ही प्रेक्षकांसाठी नेहमीच उत्तम आणि कौटुंबिक दर्जा राखण्यास बांधील आहोत, अशी ग्वाही त्यांनी दिली. यासोबतच, अशा विकृत चॅनेल्सनी हे प्रकार त्वरित थांबवावेत, असा इशारा त्यांनी दिला असून, प्रेक्षकांना कुठेही असे आक्षेपार्ह फोटो किंवा कॅप्शन्स दिसल्यास त्या व्हिडिओला लगेच ‘रिपोर्ट’ करावे, अशी विनंतीही सचिन गोस्वामी यांनी केली आहे.
