पुणे : पुण्यात अनंत चतुर्दशीच्या दिवशी गणेश विसर्जन मिरवणूक पाहण्यासाठी भाविकांची प्रचंड गर्दी होते. या पार्श्वभूमीवर पुणे मेट्रो प्रशासनाने प्रवाशांच्या सुरक्षिततेसाठी आणि सोयीसाठी मोठा निर्णय घेतला आहे. विसर्जनाच्या दिवशी मेट्रोची वाहतूक सलग 41 तास अविरतपणे सुरू राहणार आहे. यामुळे रात्री उशिरापर्यंत गणेशोत्सवाचा आनंद घेणाऱ्या पुणेकरांना घरी परतणे सोपे होणार आहे
गणेश विसर्जनाच्या पार्श्वभूमीवर स्थानकांवर होणारी गर्दी टाळण्यासाठी आणि चेंगराचेंगरीसारख्या दुर्घटना रोखण्यासाठी मेट्रो प्रशासनाने शहरातील 6 महत्त्वाच्या स्थानकांवर प्रवेश आणि बाहेर पडण्यासाठी स्वतंत्र गेट्स निश्चित केले आहेत.
प्रमुख 6 स्थानकांतील नवे नियम
1. पीसीएमसी (PCMC): फिनोलेक्स चौकाच्या बाजूने (गेट क्र. 1 व 4) प्रवेश दिला जाईल, तर बाहेर पडण्यासाठी पीसीएमसी भवनाची बाजू (गेट क्र. 2 व 3) निश्चित करण्यात आली आहे.
2. डेक्कन जिमखाना: वनाज बाजूकडील गेट क्र. 1 वरून प्रवेश मिळेल आणि रामवाडी बाजूकडील गेट क्र. 2 व 3 वरून बाहेर पडता येईल.
3. छत्रपती संभाजी उद्यान: प्रवेशासाठी वनाज बाजू (गेट क्र. 1, 3 व 4) आणि बाहेर पडण्यासाठी रामवाडी बाजू (गेट क्र. 2) खुला राहील.
4. एसएनडीटी (SNDT): वनाज बाजूकडील गेट क्र. 1 व 4 प्रवेशासाठी, तर रामवाडी बाजूकडील गेट क्र. 2 बाहेर पडण्यासाठी वापरले जाईल.
5.गरवारे कॉलेज: प्रवेशासाठी वनाज बाजू (गेट क्र. 1 व 4) आणि बाहेर पडण्यासाठी रामवाडी बाजू (गेट क्र. 3) सुरू राहील.
6.सिव्हिल कोर्ट / पीएमसी (PMC): रामवाडी बाजूकडील गेट क्र. 3 वरून प्रवेश आणि वनाज बाजूकडील गेट क्र. 1 वरून बाहेर पडण्याची सोय करण्यात आली आहे.
हे बदल आज शुक्रवारी (25 सप्टेंबर) पूर्ण दिवस लागू राहतील आणि शनिवारी सर्व व्यवस्था पूर्ववत होईल. प्रवाशांनी गोंधळ टाळण्यासाठी ठरवून दिलेल्या गेटचाच वापर करावा, असे आवाहन मेट्रो प्रशासनाने केले आहे.
