पुणे : पुणे शहरात गणेशोत्सवाचा सण मोठ्या उत्साहात साजरा होत असून ठिकठिकाणी पोलिसांचा कडक बंदोबस्त तैनात आहे. अशा परिस्थितीतही गुन्हेगारांचे धाडस वाढल्याचे चित्र समोर आले आहे. सॅलसबरी पार्क भागात दुचाकीवरून आलेल्या अज्ञान दरोडेखोरांनी एका व्यापाऱ्याला गाठून त्यांच्याकडील ४ लाख रुपयांची रोकड लुटण्याचा थरारक प्रयत्न केला.
मिळालेल्या माहितीनुसार, ही घटना बुधवारी 23 सप्टेंबर रोजी दुपारी 3.00 च्या सुमारास घडली. पीडित व्यापारी आपल्या दुकानाकडे जाण्यासाठी 4 लाख रुपये रोख रक्कम असलेली बॅग घेऊन निघाले होते. सॅलसबरी पार्क परिसरातील एका मंदिराच्या जवळ पोहचताच पाठीमागून आलेल्या दुचाकीस्वार चोरट्यांनी त्यांना रस्त्यातच अडवले.आरोपींनी व्यापाऱ्याच्या हातातील पैशांची बॅग जबरदस्तीने हिसकावून घेण्याचा प्रयत्न केला. मात्र, व्यापाऱ्याने न घाबरता बॅग घट्ट धरून ठेवत जोरदार प्रतिकार केला.
व्यापाऱ्याच्या या धाडसी प्रतिकारामुळे संतप्त झालेल्या चोरट्यांनी त्यांच्यावर तीक्ष्ण शस्त्राने जीवघेणा हल्ला चढवला. हल्ल्यानंतर व्यापारी गंभीर जखमी होऊन जमिनीवर कोसळले. परिस्थितीचे गांभीर्य ओळखून हल्लेखोर दरोडेखोर तत्काळ दुचाकीवरून फरार झाले. घडलेला प्रकार लक्षात येताच परिसरातील नागरिकांनी लगेचच स्वारगेट पोलीस ठाण्याला माहिती दिली.
जखमी व्यापाऱ्याला उपचारासाठी जवळच्या एका खाजगी रुग्णालयात दाखल करण्यात आले असून, सध्या त्यांच्यावर वैद्यकीय उपचार सुरू आहेत. या हिंसक घटनेमुळे शहरातील व्यापारी वर्गात भीतीचे वातावरण निर्माण झाले आहे. याप्रकरणी स्वारगेट पोलिसांनी अज्ञात चोरट्यांविरोधात गुन्हा नोंदवला असून, परिसरातील CCTV फुटेज तपासून आरोपींचा माग काढण्याचे काम वेगाने सुरू आहे
