पुणे : शिरूरचे खासदार डॉ. अमोल कोल्हे यांच्या एका नव्या सोशल मीडिया पोस्टने सध्या महाराष्ट्राच्या राजकीय आणि मनोरंजन विश्वात चांगलीच खळबळ उडाली आहे. “लवकरच एक मोठी घोषणा करणार,” अशी सूचक पोस्ट त्यांनी शेअर केल्यामुळे, ही घोषणा त्यांच्या आगामी एखाद्या ऐतिहासिक मालिकेबद्दल आहे की राजकीय भूमिकेबाबत, यावर तर्क-वितर्क लढवले जात आहेत.
नुकतेच नाशिक दौऱ्यावर असताना अमोल कोल्हे यांनी मुख्यमंत्री देवेंद्र फडणवीस यांचे कौतुक केले होते. तसेच सत्ताधाऱ्यांकडून काही प्रस्ताव आल्यास विचार करू, असे वक्तव्य त्यांनी केले होते. त्यांच्या या विधानामुळे ते शरद पवार यांची साथ सोडून महायुतीत सामील होणार का, अशा चर्चा रंगू लागल्या होत्या.
मात्र, त्यानंतर तातडीने पत्रकार परिषद घेत आपण शरद पवारांच्या राष्ट्रवादी काँग्रेससोबतच ठामपणे उभे असल्याचे सांगून त्यांनी या सर्व चर्चांना पूर्णविराम दिला होता. या पक्षांतराच्या चर्चा थांबत नाहीत तोच आता कोल्हेंनी ‘मोठी घोषणा’ करण्याचे संकेत दिल्याने चाहत्यांची आणि राजकीय विश्लेषकांची उत्सुकता शिगेला पोहोचली आहे.
अमोल कोल्हे हे राजकारणासोबतच अभिनय क्षेत्रातही प्रचंड सक्रिय आहेत. छत्रपती शिवाजी महाराज आणि छत्रपती संभाजी महाराज यांच्या भूमिकांमुळे घराघरांत पोहोचलेल्या कोल्हेंची ही घोषणा एखाद्या नवीन ऐतिहासिक प्रोजेक्ट किंवा मालिकेविषयी असण्याची दाट शक्यता वर्तवली जात आहे.
मात्र अमोल कोल्हे यांच्या मनात नक्की काय चालले आहे, याचा खरा खुलासा ते स्वतः जेव्हा अधिकृत घोषणा करतील तेव्हाच स्पष्ट होईल. तोपर्यंत मात्र सोशल मीडियावर त्यांच्या या पोस्टची जोरदार चर्चा सुरूच राहणार आहे.
