पुणे : सोशल मीडियावर प्रसिद्ध व्यक्तींचे बनावट व्हिडीओ तयार करून नागरिकांना गुंतवणुकीच्या जाळ्यात ओढण्याचा धक्कादायक प्रकार पुण्यात समोर आला आहे. केंद्रीय अर्थमंत्री निर्मला सीतारामन यांचा कृत्रिम बुद्धिमत्तेच्या मदतीने तयार केलेला बनावट व्हिडीओ दाखवून एका व्यावसायिकाची तब्बल 1 कोटी 7 लाख रुपयांची फसवणूक करण्यात आली. या प्रकरणाचा तपास पुणे पोलिसांकडून सुरू आहे.
जून महिन्यात संबंधित व्यावसायिकाच्या सोशल मिडीयावर निर्मला सीतारामन यांचा व्हिडीओ असलेली जाहिरात दिसली. या व्हिडीओमध्ये गुंतवणूक केल्यास मोठा परतावा मिळू शकतो, असे भासवण्यात आले होते. व्हिडीओ खरा असल्याचे समजून व्यावसायिकाने त्यातील लिंकवर क्लिक केले. त्यानंतर एका व्यक्तीने स्वतःला गुंतवणूक सल्लागार असल्याचे सांगत त्याच्याशी संपर्क साधला.
सुरुवातीला त्याला परकीय चलनाच्या व्यवहारात पैसे गुंतवण्यास सांगण्यात आले. व्यावसायिकाने काही हजार रुपये गुंतवल्यानंतर बनावट संकेतस्थळावर त्याला नफा झाल्याचे दाखवण्यात आले. विश्वास बसावा म्हणून त्याच्या खात्यात प्रत्यक्ष 1,000 रुपये जमा करण्यात आले. त्यामुळे व्यावसायिकाचा आरोपींवर अधिक विश्वास बसला.
यानंतर आरोपींनी प्रसिद्ध उद्योगपती एलॉन मस्क यांच्या स्पेस एक्स (SpaceX) कंपनीच्या शेअर्समध्ये Pre-IPO मध्ये गुंतवणुकीची संधी असल्याचे सांगितले. मोठा नफा मिळण्याचे आमिष दाखवत व्यावसायिकाकडून वेगवेगळ्या खात्यांमध्ये पैसे जमा करून घेण्यात आले. 2 जून ते 23 जुलै या कालावधीत तब्बल 36 व्यवहारांद्वारे 1 कोटी 7 लाख रुपये आरोपींच्या खात्यात जमा करण्यात आल्याचे तपासात समोर आले आहे.
विशेष म्हणजे, आरोपींनी तयार केलेल्या बनावट खात्यावर व्यावसायिकाला सुमारे 3 कोटी 98 लाख रुपयांचा नफा झाल्याचे दाखवण्यात आले. सुरुवातीला त्याला जवळपास 7 लाख रुपये काढण्याची परवानगी देण्यात आली. मात्र मोठी रक्कम काढण्याचा प्रयत्न केल्यानंतर कर, शुल्क आणि इतर कारणे सांगून आणखी पैसे मागण्यात आले. त्यानंतर आरोपींनी संपर्क तोडला. आपली फसवणूक झाल्याचे लक्षात येताच व्यावसायिकाने पोलिसांकडे धाव घेतली.
