पुणे : काही काळापूर्वी पुण्यात वेश्याव्यवसायाद्वारे आर्थिक बस्तान बसविणाऱ्या व संघटित गुन्हेगारी करणाऱ्या कल्याणी देशपांडे हिच्यासह दोघांना विशेष न्यायालयाने ७ वर्ष सक्तमजुरी आणि १० लाख ५५०० रुपयांच्या दंडाची शिक्षा ठोठावली आहे.
काही काळापूर्वी पुण्यामध्ये कल्याणी देशपांडे आणि तिच्या साथीदारांनी चांगलेच बस्तान बसविले होते. पोलिसांनी तिला अटक करताना पिटा आणि मोक्का कायदा लावण्यात आला होता. विशेष न्यायालयाने ठोठावलेली ही पिटा आणि मोक्काच्या गुन्ह्यातील ही पहिलीच शिक्षा असल्याचे बोलले जात आहे.
अतिरिक्त सरकारी वकील विजय फरगडे यांनी या प्रकरणात युक्तीवाद करताना दोघांना जास्तीत जास्त शिक्षा देण्याची मागणी केली होती. सरकारी पक्षाचा युक्तिवाद आणि पुरावे ग्राह्य धरून न्यायालयाने ही शिक्षा सुनावली आहे.
पुणे शहरात संघटीतपणे वेश्याव्यवसाय केल्या प्रकरणी पोलिसांनी संघटित गुन्हेगारी कायद्यानुसार कारवाई करताना तिला अटक केली होती. चतुःशृंगी, कोथरूड, विश्रांतवाडी, हिंजेवाडी पोलीस स्टेशनमध्ये तिच्या विरोधात २० पेक्षा अधिक गुन्ह्यांची नोंद केलेली आहे. याच प्रकरणात तिला सन २०१६ साली अटक करण्यात आली असून सध्या ती येरवडा कारागृहात बंदिस्त आहे.
