लोणी कंद : वाघोली परिसरात महिलांची छेडछाड करून दहशत निर्माण करणाऱ्या एका अट्टल गुन्हेगाराला लोणीकंद पोलिसांनी एका वर्षासाठी जिल्ह्यातुन तडीपार केले आहे. नवनाथ संभाजी गिरी (वय १९, रा. दुर्गा माता मंदिर, एकता चौक, खराडी पुणे) असे तडीपार करण्यात आलेल्या आरोपीचे नाव आहे.
लोणीकंद पोलीस ठाण्याचे वरिष्ठ पोलीस निरीक्षक गजानन पवार यांनी दिलेल्या माहितीनुसार, आरोपी नवनाथ गिरी याने लोणीकंद पोलीस ठाण्याच्या हद्दीतील वाघोली व परिसरात दहशत निर्माण करुन महिलांशी असभ्य वर्तन करीत होता. पोलिसांनी आरोपीला अटक केली होती. मात्र तो जामीनावर आल्यानंतर पुन्हा तशाच प्रकारचे गुन्हे करीत होता. आरोपीच्या कृत्यामुळे महिलांमध्ये तसेच नागरीकांमध्ये कायद्याविषयी संभ्रम निर्माण झाला होता.
सदर सराईत गुन्हेगारावर कायद्याचा वचक बसावा. या उद्देशाने वरिष्ठ पोलीस निरीक्षक गजानन पवार यांनी आरोपीवरील दाखल गुन्ह्यांचा अभिलेख तपासुन त्याच्यावर महाराष्ट्र पोलीस कायदा कलम ५५ प्रमाणे तडीपार करण्यासाठी पोलीस उप आयुक्त शशिकांत बोराटे यांना प्रस्ताव पाठविला होता. त्यानंतर पोलीस उप आयुक्त शशिकांत बोराटे यांनी आरोपीला एका वर्षाकरीता पुणे जिल्ह्यातून तडीपार केले आहे.
हि कामगिरी अप्पर पोलीस आयुक्त नामदेव चव्हाण, पोलीस उप आयुक्त शशिकांत बोराटे, सहाय्यक पोलीस आयुक्त किशोर जाधव, लोणीकंद पोलीस ठाण्याचे वरिष्ठ पोलीस निरीक्षक गजानन पवार, पोलीस निरीक्षक (गुन्हे) मारुती पाटील, यांच्या मार्गदर्शनाखाली पोलीस उप निरीक्षक रामकृष्ण दळवी, पोलीस नाईक प्रशांत कापुरे आणि सागर कडु यांच्या पथकाने केली आहे.
