पुणे : उपमुख्यमंत्री एकनाथ शिंदे यांच्या नेतृत्वातील शिवसेना पक्षाच्या युवासेनेचे जिल्हाध्यक्ष नीलेश घारे यांच्या गाडीवरती मध्यरात्रीच्या सुमारास गोळीबार केल्याची घटना काही दिवसांपूर्वी समोर आली होती. या घटनेचा पोलिसांनी तपास केल्यानंतर आता पिस्तुलाचा परवाना आणि पोलिस संरक्षण मिळवण्यासाठी त्यांनी स्वतःच्याच कारवर गोळीबार घडवून आणल्याची घटना उघड झाली आहे.या प्रकरणी पुणे पोलिसांनी बुधवारी उशिरा निलेश राजेंद्र घारे यांना अटक केली आहे.शिवसेना पदाधिकाऱ्याच्या अटकेमुळे पुण्यासह राज्याच्या राजकीय वर्तुळात खळबळ उडाली.
काय आहे प्रकरण?
पुण्यातील शिंदे गटाचा युवा नेता निलेश राजेंद्र घारे यांच्या वाहनावर वारजे माळवाडीत मध्यरात्रीच्या सुमारास अज्ञातांनी थेट फायरिंग केल्याची माहिती समोर आली होती.ही घटना 19 मे रोजी रात्री 12 वाजताच्या सुमारास घडली होती. घारे वारजे माळवाडीतील रामनगर येथील पक्ष कार्यालयात गेले असताना, दुचाकीवरून आलेल्या दोन अज्ञातांनी त्यांच्या गाडीवर गोळीबार केल्याचा दावा करण्यात आला होता. त्यानंतर घारे धावत बाहेर आले. तोपर्यंत दोघे पसार झाले होते, असे घारे यांनी दिलेल्या तक्रारीत नमूद होते.पोलिस चौकशीत सचिन गोळे, शुभम खेमणार व अजय उर्फ बगली सकपाळ यांना अटक झाली. चौकशीतून ही संपूर्ण घटना बनावट असल्याचे स्पष्ट झाले. घारे यांनी पिस्तूल परवान्यासाठी अर्ज केला होता; परंतु तो रद्द झाल्याने त्यांनी ही बनावट घटना घडवून आणली. या प्रकरणात तीन जणांना अटक करण्यात आली असून, चौथा आरोपी संकेत मोताळे सध्या फरारी आहे.
बनावट गोळीबाराचे प्रकरण समोर आल्यानंतर वारजे पोलिसांनी बुधवारी मध्यरात्री निलेश घारे यांच्यावर अटकेची कारवाई केली आहे. त्यानंतर आज निलेश घारे याला पुणे न्यायालयात हजर केले जाणार आहे.
