Narayangaon News : नारायणगाव, (पुणे) : पिकअप वाहनासह चाळीस लोखंडी पत्रे व पन्नास लोखंडी पाइप चोरी करणाऱ्या टोळीच्या मुसक्या नारायणगाव पोलिसांनी आवळल्या आहेत. यापैकी दोघांना पोलिसांनी ताब्यात घेतले असून त्यांचा आणखी एक साथीदार पळून जाण्यात यशस्वी झाला आहे. (Narayangaon News)
भूषण बबन टेमकर (वय २०) व रोहन नवनाथ शिंदे (वय २०, दोघेही रा. अवसरी खुर्द, ता. आंबेगाव) अशी अटक करण्यात आलेल्या दोघांची नावे आहेत. तर समीर पोखरकर असे पळून गेलेल्या आरोपीचे नाव आहे. अटक आरोपींकडून पोलिसांनी पिकअप गाडी, चाळीस लोखंडी पत्रे व पन्नास लोखंडी पाइप असा सुमारे दोन लाख रुपये किमतीचा मुद्देमाल जप्त केला आहे.
पोलिसांनी दिलेल्या माहितीनुसार, शुक्रवारी (ता. २३) नारायणगाव (ता. जुन्नर) ग्रामपंचायत हद्दीत ठेवलेले एक लाख रुपये किमतीचे चाळीस पत्रे व पन्नास लोखंडी पाइप अज्ञात चोरट्यांनी चोरून नेल्याची तक्रार तेजस संजय बोऱ्हाडे (रा. नारायणगाव) यांनी पोलिसांना दिली होती. त्यानुसार पोलिसांनी तपास करून दोन संशयित आरोपींना मंगळवारी (ता. २७) ताब्यात घेतले आहे. (Narayangaon News)
दरम्यान, त्यांच्याकडे अधिक तपास केला असता सदरचा मुद्देमाल चोरी केल्याची कबुली आरोपींनी पोलिसांना दिली असून पोलिसांनी त्यांच्याकडून पिकअप गाडी, चाळीस लोखंडी पत्रे व पन्नास लोखंडी पाइप असा सुमारे दोन लाख रुपये किमतीचा मुद्देमाल जप्त केला. तसेच त्यांचा साथीदार समीर पोखरकर हा फरार झाला आहे. उपविभागीय पोलिस अधिकारी रवींद्र चौधर यांचे मार्गदर्शनाखाली नारायणगाव पोलीस तपास करीत आहे.
