Nagar news : कोतवाली, (नगर) : यवतमाळ येथील प्रवाशाला रिक्षात बसवून मारहाण करून लुटणाऱ्या दोघांपैकी एकाला कोतवाली पोलिसांनी सीसीटीव्ही फुटेजच्या आधारे माळीवाडा बस स्थानकाजवळून ताब्यात घेतले आहे .
सीसीटीव्ही फुटेजच्या आधारे आरोपी जेरबंद
मोईन बादशहा शेख (वय २२ वर्षे, रा. मेहराब मशिदजवळ, मुकुंदनगर अहमदनगर) असे अटक करण्यात आलेल्या आरोपीचे नाव आहे. पोलिसांनी त्याच्याकडून गुन्ह्यात वापरलेली रिक्षा जप्त केली आहे. (Nagar News ) याप्रकरणी प्रदिप दादाराव कदम (वय ३० वर्षे, धंदा आचारी, रा. श्रीरामपुर ता. पुसद जि. यवतमाळ) यांनी कोतवाली पोलीस ठाण्यात फिर्याद दिली होती.
पोलिसांनी दिलेल्या माहितीनुसार, बुधवारी (ता. ०९) प्रदिप कदम हे राजासाब वाईन्स समोरुन रेल्वे स्टेशनकडे जाण्यासाठी रिक्षामध्ये बसले होते. रिक्षा चालकाने प्रदिप कदम यांना रेल्वे स्टेशनकडे न घेवुन जाता अरणागाव रोडवरील अजय पेट्रोलपंपाच्या दिशेने नेले. (Nagar News ) रिक्षा चालक व त्याचा मोटरसायकलवरील साथीदार या दोघांनी कदम यांना लोखंडी रॉडने मारहाण करत जीवघेणा हल्ला केला. यावेळी दोघांनी कदम यांच्याजवळून जवळील साडेचार हजार रुपये रोख व मोबाईल बळजबरीने चोरून नेला होता.
याप्रकरणी कोतवाली पोलीस ठाण्यात अज्ञात आरोपींविरुद्ध गुन्हा दाखल करण्यात आला होता. पोलीस निरीक्षक चंद्रशेखर यादव यांनी आरोपींना शोधून अटक करण्याच्या सूचना गुन्हे शोध पथकाला दिल्या होत्या. (Nagar News ) आरोपी मोईन शेख व त्याचा साथीदार हे दोघे आरोपी सीसीटीव्ही फुटेजच्या आधारे निष्पन्न झाल्यानंतर कोतवाली पोलिसांनी त्यांचा शोध सुरू केला होता.
मोईन शेख हा माळीवाडा बसस्थानक जवळ गुन्ह्यात वापरलेल्या रिक्षातून येणार असल्याच्या माहितीवरून कोतवाली पोलिसांनी त्याला अटक केली. (Nagar News ) गुन्ह्याचा तपास पोलीस निरीक्षक चंद्रशेखर यादव यांच्या मार्गदर्शनाखाली मोरे करीत आहेत.
दरम्यान, मोईन बादशहा शेख हा सराईत आरोपी असून त्याच्यावर कोतवाली पोलीस ठाण्यात आर्म ॲक्टचा एक, जबरी चोरीचे तीन, खुनाचा प्रयत्न प्रयत्न केल्याचा एक असे पाच गुन्हे दाखल आहेत.
