Nagar News : कोतवाली, (नगर) : शहरातील मध्यभागी असलेल्या सराफा बाजारातील वर्मा ज्वेलर्स दुकान फोडून रेल्वेने प्रवास करून पळून जाण्याच्या तयारीत असलेल्या टोळीतील दोन आरोपींना कोतवाली पोलिसांनी मुद्देमालासह नाशिक येथून जेरबंद केले आहे.
३ लाख ३४ हजार ९०० रुपयांचा मुद्देमाल हस्तगत
अक्षयसिंग बिरूसिंग जुनी (वय – २२, रा. वैदवाडी, गोसावी वस्ती, हडपसर), अनमोल चरणसिंग शिकलकर (वय – २३, रा. नाशिक रोड, सिन्नर फाटा सिकलकर वस्ती) अशी अटक केलेल्या दोन आरोपींची नावे आहेत. त्यांच्याकडून पोलिसांनी ३ लाख ३४ हजार ९०० रुपयांचा मुद्देमाल हस्तगत करण्यात आला आहे. अशी माहिती कोतवाली पोलीस ठाण्याचे वरिष्ठ पोलीस निरीक्षक चंद्रशेखर यादव यांनी दिली.
पोलीस निरीक्षक चंद्रशेखर यादव यांनी दिलेल्या माहितीनुसार, रविवारी (ता. ०१) सराफा बाजारातील वर्मा ज्वेलर्स या सराफ दुकानाचे शटर उचकटून अज्ञात चोरट्यांनी सोन्याचे दागिने व रोख रक्कम असा २४ लाख ६८ हजार रुपयांचा ऐवज लुटून नेह्ला होता. याप्रकरणी संतोष सिताराम सहदेव ऊर्फ वर्मा (वय ५७, रा. गुंजाळ हॉस्पिटल, माणिक नगर ता. जि. अहमदनगर) यांनी कोतवाली पोलीस ठाण्यात फिर्याद दिली होती.
सदर आरोपींच्या शोधासाठी तीन पथके वेगवेगळ्या ठिकाणी रवाना केली होती. सराफा बाजारातील दुकान फोडण्यापूर्वी आरोपींनी नाशिक मधून मारुती इको कार चोरली होती. चोरीच्या कारमधून नगरमध्ये येऊन सराफा बाजारातील दुकान फोडले होते. कोतवाली पोलिसांना खाबऱ्यामार्फत माहिती मिळाली की गुन्हा केलेले दोन आरोपी मुंबई कडे पळून जात आहेत. त्यानुसार आरोपींचा शोध घेत असतानायेवल्या नजीक रस्त्याच्या कडेला चोरीची चारचाकी गाडी कोतवाली पोलिसांना आढळून आली. तो परिसर कोतवाली पोलिसांनी पिंजून काढला.
दरम्यान, या माहितीच्या आधारे पोलिसांनी आरोपीच्या वर्णनावरून रेल्वेची माहिती काढून दोघांना नाशिक येथून ताब्यात घेतले. त्यांच्याकडे कसून चौकशी केली असता दोन्ही आरोपींनी इतर सहा साथीदारांच्या मदतीने गुन्हा केल्याची कबुली दिली आहे. त्यांच्याकडून पोलिसांनी ३ लाख ३४ हजार ९०० रुपयांचा मुद्देमाल हस्तगत केला आहे.
आरोपी अक्षयसिंग जुन्नी याच्यावर हडपसर पोलीस ठाण्यात १२ गुन्हे दाखल..
सदर घटनेतील आरोपी अक्षयसिंग बिरूसिंग जुनी याच्यावर हडपसर पोलीस ठाण्यात विविध कलमांतर्गत १२ गुन्हे दाखल असून वानवडी पोलीस ठाण्यात १ गुन्हा दाखल आहे. तसेच तो हडपसर पोलीस स्टेशन पुणे शहर यांचे मोक्याचे गुन्ह्यात फरार आरोप आहे. कोतवाली पोलिसांनी त्याला व त्याच्या साथीदाराला बेड्या ठोकल्या आहेत.
सदरची कामगिरी पोलीस निरीक्षक चंद्रशेखर यादव, सहायक पोलीस निरीक्षक विश्वास भान्सी, पोलीस उपनिरीक्षक प्रविण पाटील, गजेंद्र इंगळे, अंमलदार तनविर शेख, गणेश धोत्रे, पोलीस नाईक योगेश भिंगारदिवे, सलिम शेख, शाहीद शेख, इस्राईल पठाण, ए. पी इनामदार, अमोल गाढे, संदिप थोरात, अभय कदम, सोमनाथ राउत, सुजय हिवाळे, अतुल काजळे, कैलास शिरसाठ, सतिश शिंदे तसेच दक्षीण मोबाईल सेलचे राहुल गुंड यांच्या पथकाने केली आहे.
