Nagar News : नगर, (पुणे) : ग्रामपंचायत बैठकीत मागील खर्चाचा हिशोब मागतो म्हणून सरपंच व उपसरपंचाच्या पतीने केलेल्या मारहाणीत ग्रामपंचायत सदस्याचा उपचारादरम्यान मृत्यू झाला आहे.
गणेश रावसाहेब रावण (वय-३२) असे मृत्यू झालेल्या ग्रामपंचायत सदस्याचे नाव आहे. याप्रकरणी मयत सदस्याची आई रेखा रावसाहेब रावण (वय ५२ रा. घोडेगाव) यांनी खर्डा पोलीस ठाण्यात फिर्याद दिली आहे.
खुनाचा गुन्हा दाखल
पोलिसांनी दिलेल्या माहितीनुसार, मुलगा गणेश रावसाहेब रावण (वय ३२) हा ग्रामपंचायत निवडणूक २०२१ मध्ये ग्रामपंचायत सदस्य म्हणून निवडून आला होता. तो आणि शरद जगताप एकाच प्रभागातून निवडून आले होते. यानंतर सरपंच पदासाठी गणेशने शरद जगताप यास मतदान केले होते. वर्षानंतर गणेशला सरपंच करायचे ठरले होते. पण एक वर्ष झाले तरी सरपंच शरद जगताप याने राजीनामा दिला नाही. यामुळे मयत गणेश रावण व सरपंच शरद जगताप यांच्यात सतत भांडणे होत होती.
३० जून २०२३ रोजी ग्रामपंचायत मध्ये सरपंच शरद जगताप, उपसरपंचाचे पती शमशाद शौकत मुलानी ग्रामसेवक रामदास गोरे हजर होते. यावेळी मागील खर्चाचा हिशोब मागितल्यावरून सरपंच व माझी वादावादी झाली. मी घरी येत असताना घोडेगाव खुरदैठण रस्त्यावरील पुलाजवळ सरपंच शरद जगताप व शौकत सैदु मुलानी आले व मोटारसायकल आडवी लावून तू हिशोब मागतो काय म्हणत शिवीगाळ करत आमच्या नादी लागला तर तुला सोडणार नाही. त्यानंतर शौकत मुलानी यांने गंचाडी पकडून हाताने कानाखाली मारहाण केली. तर शरद जगताप याने हाताने पाठीमागून डोक्यावर मारहाण केली यावेळी जालिंदर कल्याण भोंडवे हे जवळून जात असताना त्यांनी आमचे भांडण सोडवले. मला झालेल्या मारहाणीमुळे माझे डोके दुखत आहे, असे सांगितले.
यानंतर पंधरा ते वीस मिनिटांनी गणेशला उलटी झाली. त्याला तातडीने जामखेड येथील खाजगी दवाखान्यात दाखल करण्यात आले. नंतर सीटीस्कॅन करण्यात आला. रिपोर्ट आल्यावर नगरला हॉस्पिटलमध्ये दाखल करण्यास सांगितले. त्यानुसार नगरला दाखल केले. उपचारादरम्यान २ जुलै २०२३ रोजी सकाळी गणेशचे निधन झाले.
दरम्यान, पोलिसांच्या चौकशीमध्ये वैद्यकीय अहवालावरून २५ ऑगस्ट रोजी गणेशची आई रेखा रावसाहेब रावण यांनी दिलेल्या फिर्यादीवरून खर्डा पोलीस स्टेशनला खुनाचा गुन्हा दाखल करण्यात आला आहे. यामुळे परिसरात एकच खळबळ उडाली आहे. सध्या दोन्ही आरोपी फरार आहेत पुढील तपास सहायक पोलीस निरीक्षक महेश जानकर हे करत आहेत. या प्रकरणी खर्डा पोलीस स्टेशनला २५ ऑगस्ट २०२३ रोजी खुनाचा गुन्हा दाखल करण्यात आला आहे.
