पिंपरी : पिंपरी-चिंचवडमधून एक धक्कादायक बातमी समोर आली आहे. खासगी कंपनीच्या डिलिव्हरी बॉयनं एका सोसायटीमधील सुरक्षा रक्षकाला लाकडी दांडक्यानं आणि लोखंडी रॉडनं बेदम मारहाण केल्याची घटना घडली आहे. या घटनेत हा सुरक्षा रक्षक गंभीर जखमी झाला असून ही संपूर्ण घटना सीसीटीव्हीमध्ये कैद झाली आहे. या प्रकरणात पोलिसांनी मारहाणीचा गुन्हा दाखल केला असून आरोपी डिलिव्हरी बॉय आणि त्याला साथ देणाऱ्या त्याच्या मित्रांना ताब्यात घेतलं आहे. या घटनेचा अधिक तपास सुरू असल्याची माहिती पोलिसांकडून देण्यात आली आहे.
मिळालेल्या माहितीनुसार, एका खासगी कंपनीच्या डिलिव्हरी बॉयला या सुरक्षा रक्षकानं दुसऱ्या लिफ्टनं जायला सांगितलं. या किरकोळ कारणावरून डिलिव्हरी बॉयनं त्याच्या साथिदारांना बोलावू सुरक्षा रक्षकाला बेदम मारहाण केली आहे. ही घटना सीसीटीव्हीमध्ये कैद झाली आहे. पिंपरी चिंचवड शहरातील रावेत परिसरात असलेल्या पुणे व्हीला या सोसायटीमध्ये ही घटना घडली आहे.
एका खासगी कंपनीच्या डिलिव्हरी बॉयनं या सोसायटीच्या लिफ्टमध्ये प्रवेश केला होता, मात्र सुरक्षारक्षकांनी या डिलिव्हरी बॉयला दुसऱ्या लिफ्टनं जाण्याची विनंती केली. याचा राग आल्यानं या डिलिव्हरी बॉयनं त्याच्या साथिदारांना सोसायटीमध्ये बोलावून सुरक्षा रक्षकाला लाकडी दांडक्यानं आणि लोखंडी रॉडने बेदम मारहाण केली. या घटनेत हा सुरक्षा रक्षक जखमी झाला आहे. या प्रकरणात रावेत पोलीसांनी डिलीव्हरी बॉय आणि त्याच्या सर्व साथीदारांना ताब्यात घेतलं आहे. त्यांच्यावर मारहाण केल्या प्रकरणी गुन्हा दाखल करण्यात आला आहे.
