पुणे : मुलगा काही कामधंदा करीत नाही, दारूचे व्यसन असल्याने लग्न जमत नसल्याच्या कारणावरून बापानेच मुलाचा कुऱ्हाडीने खून केल्याची घटना घडली आहे. हि घटना मंगळवारी (ता. ०२) सुदुंबरे (ता. मावळ) ग्रामपंचायत हद्दीत घडली आहे.
समीर बाळू बोरकर (वय-३४, रा. बोरकरवस्ती, सुदुंबरे, ता. मावळ) असे खून झालेल्या मुलाचे नाव आहे. तर बाळू बबन बोरकर (वय-५५) असे खून करणाऱ्या बापाचे नाव आहे. याप्रकरणी समीरच्या भावजयीने तळेगाव एमआयडीसी पोलिस ठाण्यात फिर्याद दिली आहे. पोलिसांनी आरोपी बाळू बोरकर याला ताब्यात घेतले आहे.
पोलिसांनी दिलेल्या माहितीनुसार, बाळू शेती आणि पशुपालन व्यावसाय करतात. त्याचा मुलगा समीर कामधंदा करत नव्हता. त्याला दारुचे व्यसन होते. त्याच्यामुळे त्याचे लग्न जमत नसल्याने बाळू आणि समीर यांचा वारंवार वाद होत असे.
बाळू यांची थोरली सून मंगळवारी दुपारी तीन वाजण्याच्या सुमारास घरात स्वयंपाक करीत होती. त्या वेळी समीर हॉलमध्ये झोपला होता. बाळू अचानक घरी आले. त्यांनी कुऱ्हाडीच्या उलट्या बाजूने समीरच्या डोक्यात मारुन त्याची हत्या केली. समीरच्या भावजयीने हॉलमध्ये जाऊन पाहिले असता समीर हॉलमध्ये रक्ताच्या थारोळ्यात पडला होता. दरम्यान, संपूर्ण प्रकरणाचा तळेगाव दाभाडे पोलीस तपास करत आहेत.
