उरुळी कांचन, (पुणे) : दौंड तालुक्यातील केडगाव परिसरात उघडकीस आलेल्या हाय-प्रोफाइल बेकायदेशीर गर्भलिंगनिदान प्रकरणाने संपूर्ण जिल्ह्यात खळबळ उडाली आहे. यवत पोलिसांनी या प्रकरणाची पाळेमुळे खणून काढत तपासाची व्याप्ती वाढवली असून, वाघोली (ता. हवेली) येथून डॉ. अतुल जाधव या बड्या डॉक्टरला बेड्या ठोकल्या आहेत.
न्यायालयाने आरोपी डॉक्टरला पाच दिवसांची पोलीस कोठडी सुनावली आहे. धक्कादायक बाब म्हणजे, या काळ्या धंद्यात आता उरुळी कांचन (ता. हवेली) येथीलही एका नामांकित डॉक्टरांचा समावेश असल्याची चर्चा परिसरात रंगू लागली असून, पोलिसांचे पथक त्यांच्यावरही नजर ठेवून आहे.
पोलीस तपासात या प्रकरणातील मुख्य आरोपी अण्णा गिरी याला पोलिसांनी यापूर्वीच बेड्या ठोकल्या असून, त्याच्या पोलीस कोठडीत न्यायालयाने वाढ केली आहे. धक्कादायक बाब म्हणजे, अण्णा गिरी याच्याकडे कोणतीही वैद्यकीय पदवी नसल्याची माहिती तपासात निष्पन्न झाली असून केवळ काही वर्षांच्या अनुभवाच्या जोरावर तो हा गर्भलिंगनिदानाचा जीवघेणा काळाबाजार चालवत होता.
पोलिसांनी अण्णा गिरीची कसून चौकशी केली असता ‘वाघोली कनेक्शन’ समोर आले. अण्णा गिरी हा गर्भवती महिलांचे बेकायदेशीरपणे गर्भलिंगनिदान करायचा. त्यानंतर पुढील प्रक्रियेसाठी (गर्भपातासाठी किंवा उपचारासाठी) तो या महिलांना वाघोली येथील डॉ. अतुल जाधव यांच्याकडे पाठवत असल्याचे तपासात निष्पन्न झाले आहे. अटक करण्यात आलेले डॉ. अतुल जाधव हे ‘बीएएमएस’ पदवीधारक असून, एका पदवीधराने बोगस डॉक्टरसोबत हातमिळवणी करून हा गोरखधंदा चालवल्याने वैद्यकीय क्षेत्रातून संताप व्यक्त होत आहे.
वाघोलीच्या डॉक्टरला अटक झाल्यानंतर आता या प्रकरणाची सुई उरुळी कांचनकडे वळली आहे. अण्णा गिरी हा उरुळी कांचन परिसरातील एका डॉक्टराच्याही संपर्कात होता आणि त्यांच्याकडेही काही महिलांना पाठवले गेल्याची दाट शक्यता वर्तवली जात आहे. त्यामुळे उरुळी कांचनचे ‘ते’ संशयित डॉक्टर कोण? याकडे सर्वांचे लक्ष लागले आहे.
दरम्यान, या संपूर्ण रॅकेटच्या मागे केवळ दोन डॉक्टर नसून, गर्भलिंगनिदान करणारी खूप मोठी आंतरजिल्हा साखळी, काही दलाल आणि औषध विक्रेते कार्यरत असल्याचा संशय यवत पोलिसांनी व्यक्त केला आहे. या प्रकरणात अजून कोणते बडे मासे गजाआड होणार? आणि उरुळी कांचनच्या संशयित डॉक्टरांवर पोलीस कधी कारवाई करणार? याकडे आता जागरूक नागरिकांचे लक्ष लागले आहे.
