पुणे : रात्री उशीरापर्यंत सुरु असलेले चायनिज सेंटर बंद केल्याच्या रागातून एकाने गस्तीवर असलेल्या बीट मार्शल वर चाकूने सपासप वार केल्याची घटना विमानतळ पोलीस ठाण्याच्या हद्दीत घडली आहे. शनिवारी (ता. १४) रात्री सव्वा अकरा वाजण्याच्या सुमारास समायरा चायनिज सेंटर, धानोरी जकात नाका, लोहगाव येथे हि घटना घडली आहे. यामध्ये पोलीस कर्मचारी गंभीर जखमी झाले आहेत.
महानंदेश्वर उर्फ मल्ल्या महादेव बताले (वय- २४ रा. नळदुर्ग, ता. तुळजापूर जि. उस्मानाबाद) असे मारहाण कलेल्या आरोपीचे नाव आहे. तर पोलीस नाईक सचिन उत्तम जगदाळे असे गंभीर जखमी झालेल्या पोलीस कर्मचाऱ्याचे नाव आहे. त्यांनी दिलेल्या तक्रारीनुसार विमानतळ पोलीस ठाण्यात बताले याच्यावर गुन्हा दाखल केला आहे.
पोलिसांनी दिलेल्या माहितीनुसार, फिर्यादी पोलीस नाईक सचिन जगदाळे हे लोहगाव बीट मार्शलवर गस्त घालीत होते. त्यावेळी त्यांना प्राप्त झालेल्या कॉलनुसार ते समायरा चायनीज सेंटर बंद करण्यासाठी गेले होते. त्यावेळी आरोपी त्याठिकाणी जेवण करण्यासाठी आला होता. त्याला जेवण मिळाले नसल्याच्या रागातून त्याने चायनिज सेंटर मधील चाकूने जगदाळे यांच्या डाव्या गालावर वार केला. यामध्ये जगदाळे हे गंभीर जखमी झाले. आरोपी बताले याच्याविरुद्ध सरकारी कामात अडथळा निर्माण केल्याचा गुन्हा दाखल करण्यात आला आहे.
दरम्यान, या घटनेची माहिती मिळताच रात्रगस्त अधिकारी पोलीस उपायुक्त मुख्यालय रोहिदास पवार, विमानतळ पोलीस ठाण्याचे वरिष्ठ पोलीस निरीक्षक विलास सोंडे, पोलीस निरीक्षक गुन्हे मंगेश जगताप, पोलीस निरीक्षक गुन्हे उत्तम चक्रे, सहायक पोलीस निरीक्षक एम.एस. पाठक यांनी घटनास्थळी धाव घेतली. जखमी सचिन जगदाळे यांना तातडीने खासगी दावाखान्यात उपचारासाठी दाखल करण्यात आले. पुढील तपास विमानतळ पोलीस करीत आहेत.
