Hadapsar News : हडपसर, (पुणे) : बनावट चावीने केवळ मौजमजा करण्यासाठी लोणी काळभोर, हडपसर शहरातील विविध पोलीस ठाण्याच्या हद्दीतून दुचाकी चोरणाऱ्या सराईत चोरट्याला गुन्हे शाखेच्या पोलिसांनी हडपसर परिसरातून अटक केली.
सराईत चोरट्याला अटक
मुज्जफर ऊर्फ सलमान रफीक पठाण (वय २६, रा. घुलेनगर, मांजरी खुर्द, हडपसर) असे अटक केलेल्या आरोपीचे नाव आहे. त्याच्याकडून पोलिसांनी वाहन चोरीचे आठ गुन्हे उघडकीस आणून दोन लाख रूपयांचा ऐवज जप्त केला आहे.
पोलिसांनी दिलेल्या माहितीनुसार, पुणे शहरात वाहन चोरीचे गुन्ह्याचे प्रमाण वाढत असल्याने त्याबाबत कारवाई करण्याच्या सूचना आयुक्तांनी गुन्हेशाखा व सर्व पोलिसांना दिल्या होत्या. पोलिस अंमलदार शिवाजी जाधव, संदीप येळे आणि राहुल इंगळे यांनी तांत्रिक विश्लेषणाच्या मदतीने पठाणला हडपसर भागातून ताब्यात घेतले. त्याच्याकडून चोरीस गेलेली दुचाकी जप्त केली आहे. चौकशीदरम्यान तो बनावट चावीने केवळ मौजमजा करण्यासाठी दुचाकी चोरत असल्याचे सांगितले.
त्याच्याकडे चौकशी केली असता पठाण हा वाहनचोरी करताना बसने घरातुन निघत असे तसेच वाहनचोरी केल्यानंतर त्याच वाहनावर बसून निघून जात असे. जाताना सीसीटीव्ही फुटेज मध्ये दिसेल ही शक्यता गृहीत धरून तो अंगावर ८ ते १० वेगवेगळ्या रंगाचे शर्ट घालत असे जेणेकरून त्याचा सीसीटीव्ही आधारे शोध घेताना अडथळे निर्माण होतील.
सदरची कामगिरी हडपसर पोलीस ठाण्याचे वरिष्ठ पोलीस निरीक्षक रविंद्र शेळके, गुन्हे पोलीस निरीक्षक विश्वास डगळे, संदीप शिवले रंगो, यांचे सूचनाप्रमाणे तपास पथकाचे सहायक पोलीस निरीक्षक विजयकुमार शिंदे, पोलीस उप निरीक्षक अविनाश शिंदे, पोलीस अंमलदारन सुशील लोणकर, शाहीद शेख, प्रशांत दुधाळ, निखील पवार, अतुल पंधरकर, भगवान हंबर्डे, अनिरूध्द सोनवणे, अजित मदने, चंद्रकांत रेजीतवाड, सचिन गोरखे, यांचे पथकाने करुन प्रशंसनीय कामगिरी केली आहे.
