हडपसर, (पुणे) : हडपसर पोलीस ठाण्याच्या हद्दीतील मंत्री मार्केट समोर मिनी डंपरने ५५ वर्षीय महिलेला दिलेल्या धडकेत जखमी झाल्याची घटना घडली आहे. गुरुवारी (ता. ०५) सकाळी पाऊणे अकरा वाजण्याच्या सुमारास हा अपघात झाला आहे.
उषा सतीश चौधरी (वय – ५५, रा. – फुरसुंगी) असे अपघातात जखमी झालेल्या महिलेचे नाव आहे. तर भोजाजी बापूराव साळवे (वय- ५५, रा. वाघोली, ता. हवेली) असे चालकाचे नाव आहे. याप्रकरणी सागर सतिष चौधरी, (वय- ३७, रा. उरुळी देवाची, फुरसुंगी, ता. हवेली) यांनी हडपसर पोलीस ठाण्यात फिर्याद दिली आहे. त्यानुसार पोलिसांनी डंपर चालकाला ताब्यात घेतले आहे.
पोलिसांनी दिलेल्या माहितीनुसार, सागर चौधरी यांची आई सोमवारी सकाळी पाऊणे अकरा वाजण्याच्या सुमारास मंत्री मार्केट परिसरातून रस्त्याने पायी निघाल्या होत्या. यावेळी वाघोली ते महंमदवाडी जाणाऱ्या मिनी डंपरने चौधरी यांना जोरदार धडक दिली. या अपघातात चौधरी या जखमी झाल्या.
दरम्यान, या अपघातात चौधरी या जखमी झाल्या असून त्यांच्यावर हडपसर येथील एका खाजगी रुग्णालयात उपचार सुरु आहेत. याप्रकरणी सागर चौधरी यांनी दिलेल्या फिर्यादीनुसार डंपरचालकाच्या विरोधात गुन्हा दाखल करून अटक करण्यात आली आहे. पुढील तपास सहायक पोलीस निरीक्षक कुदळे यांच्या मार्गदर्शनाखाली पोलीस हवालदार सोनवणे करीत आहेत.
