सासवड, (पुणे) : दुबईस्थित ‘ट्रिलियनर’ कंपनीच्या ‘TLC 2.0’ या प्री-लॉन्च क्रिप्टोकरन्सीमध्ये खोट्या क्रिप्टोकरन्सीच्या नावाने 21 लाख 50 हजारांची फसवणूक केल्याची घटना उघडकीस आली आहे. गुंतवणुकीवर दरमहा 40 टक्के कॉईन, दामदुप्पट परतावा देण्याचे आमिष दाखवून फसवणूक केल्याप्रकरणी सासवड पोलीस ठाण्यात पाच जणांविरुद्ध गुन्हा दाखल करण्यात आला आहे. सदरची घटना 2024 ते ऑगस्ट 2026 या कालावधीत घडली आहे.
याबाबत हर्षदा अमोल मुऱ्हे (वय -36, रा. शिरवळ, ता. खंडाळा, जि. सातारा) यांनी सासवड पोलीस ठाण्यात फिर्याद दिली आहे. त्यानुसार शुभम प्रकाश जगताप, संतोष कटके, संकेत इनामके, अनिता प्रकाश जगताप (सर्व रा. सासवड, ता. पुरंदर) आणि कालिका ज्ञानेश्वर शिंदे (रा. मुंबई) यांच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपींनी फिर्यादी व त्यांच्या कुटुंबाचा विश्वास संपादन करून ट्रिलियनर कंपनीच्या ‘TLC 2.0’ या क्रिप्टोकरन्सीमध्ये गुंतवणूक केल्यास मोठा आर्थिक फायदा होईल असे भासवले. सुरुवातीला काही प्रमाणात परतावा मिळाल्याचे दाखवून आरोपींनी फिर्यादी व त्यांच्या नातेवाईकांकडून बँक ट्रान्सफर व ऑनलाइनद्वारे एकूण 21 लाख 50 हजार रुपये उकळले.
परंतु, मे 2025 नंतर आरोपींनी सर्व्हरचे काम चालू असल्याचे सांगून व नंतर मार्केट डाऊन असल्याचे कारण देऊन परतावा देण्यास टाळाटाळ केली. मूळ गुंतवणुकीची रक्कम व ठरलेला परतावा न देता आर्थिक अपहार केल्याचे लक्षात आल्यानंतर फिर्यादींनी पोलिसांत धाव घेतली. या प्रकरणी सासवड पोलिसांनी आरोपींविरुद्ध विविध कलमान्वये गुन्हा दाखल केला आहे. सदर गुन्ह्याचा पुढील तपास पोलीस निरीक्षक संतोष घोळवे करत आहेत.
