पिंपरी-चिंचवड: पिंपरी-चिंचवड परिसरात नात्याला आणि विश्वासाला काळीमा फासणारी एक अत्यंत संतापजनक घटना समोर आली आहे. एका महिलेच्या मित्रानेच ओळखीचा गैरफायदा घेत तिच्या १३ वर्षीय अल्पवयीन मुलीचा विनयभंग केल्याचा धक्कादायक प्रकार उघडकीस आला आहे. याहूनही धक्कादायक बाब म्हणजे, मुलीने हा प्रकार आपल्या आईला सांगूनही आईने मित्राचीच बाजू घेत मुलीला गप्प केले. अखेर मुलीच्या वडिलांनी पोलिसांत धाव घेतल्यानंतर हा प्रकार उजेडात आला.
पोलिसांनी दिलेल्या माहितीनुसार, पीडित मुलीचे आई-वडील २०१८ पासून विभक्त राहत असून त्यांच्या घटस्फोटाचा खटला न्यायालयात प्रलंबित आहे. १३ वर्षीय पीडित मुलगी इयत्ता सातवीत शिकत असून ती आपल्या आईसोबत राहते. १५ जून रोजी आईचा एक मित्र त्यांच्या घरी आला होता. आई घरात उपस्थित असतानाच या नराधमाने चिमुकलीला जवळ घेत तिच्यासोबत अश्लील कृत्य केले आणि अयोग्य वक्तव्ये केली. या अचानक घडलेल्या प्रकारामुळे मुलगी प्रचंड घाबरली.
घाबरलेल्या मुलीने आपल्या आईला घडलेला सर्व प्रसंग सांगितला. मात्र, आईने आपल्या मुलीच्या सुरक्षेसाठी कठोर पावले उचलण्याऐवजी, तो माझा मित्र आहे, त्याच्याबाबत काही बोलू नकोस, असे सांगून मुलीचे तोंड बंद करण्याचा प्रयत्न केला. जन्मदात्रीनेच आरोपीची पाठराखण केल्यामुळे मुलगी अधिकच खचली. अखेर असहाय्य झालेल्या या मुलीने तिच्या वडिलांना सर्व प्रकार सांगितला. घटनेचे गांभीर्य आणि विकृती लक्षात घेत वडिलांनी तातडीने १८ ऑगस्ट रोजी चिंचवड पोलीस ठाण्यात जाऊन रीतसर तक्रार दाखल केली.
वडिलांच्या फिर्यादीवरून चिंचवड पोलिसांनी आरोपी मित्राविरोधात विनयभंग आणि बालकांचे लैंगिक अत्याचारापासून संरक्षण यांसारख्या गंभीर कलमांखाली गुन्हा दाखल केला आहे. सध्या पोलीस या प्रकरणाचा अधिक आणि सखोल तपास करत आहेत. स्वतःच्या मुलीवर अत्याचार होत असताना तिला न्याय मिळवून देण्याऐवजी आईनेच मित्राची बाजू घेतल्यामुळे या घटनेबद्दल परिसरात तीव्र संताप व्यक्त केला जात आहे.
