पुणे : पोलीस वाहतूक नियमन करताना वाहतूक विभागाच्या क्रेन व्हॅनने नियमाची पायमल्ली करणारी गाडी उचलली. त्यावर गाडी मालकाने फेसबुक लाईव्ह करताना पोलिसांच्याच कामावर प्रश्नचिन्ह निर्माण केले. त्यांनी केलेल्या फेसबुक लाईव्हवर अत्यंत अश्लील आणि हीन दर्जाच्या कमेंट करण्यात आल्या. हा लाईव्ह करणाऱ्या व कमेंट करणाऱ्या ९ लोकांच्या विरोधात शिवाजीनगर पोलीस स्टेशनमध्ये गुन्हा दाखल करण्यात आला आहे.
विजय सागर ( रा . अहिरिश गार्डन , मॉडेल कॉलनी , शिवाजीनगर , पुणे ), प्रशांत पाटील, परिक्षीत याल्लीर, विजय चौगुले, प्रज्वल सोनवणे, सचिन वाबळे, सतिष काळे, दत्तात्रय पटेरे, गणेश मोरे यांच्यावर गुन्हा दाखल करण्यात आला आहे.
याबाबत महिला पोलिसाने दिलेल्या तक्रारीनंतर गुन्हयाची नोंद करण्यात आली. वाहतूक कोंडीचा प्रश्न पुणेकरांना भडसावत असताना कोंडी सोडविण्यासाठी पोलीस शर्थीचे प्रयत्न करत असतात. मात्र वाहतूक नियमन करणाऱ्या तसेच कर्तव्य बजावणाऱ्या पोलिसांना अनेकदा टीकेचा सामना करावा लागतो. असाच प्रकार या गुन्ह्याच्या निमिताने समोर आला आहे.
शिवाजीनगर पोलीस स्टेशनचे वरिष्ठ पोलीस अरविंद माने यांनी दिलेल्या माहितीनुसार, २७ नोव्हेंबर रोजी दुपारी तीन वाजण्याच्या सुमारास वाहतुक नियम मोडल्यानंतर नंतर पोलिसांच्या क्रेन गाडीने विजय सागर यांची दुचाकी उचलली. त्यावर सागर यांनी त्याच्या मोबाईलमध्ये संबंधीत घटनेचे फेसबुक लाईव्ह केले . त्यांच्या या फेबसुक लाईव्हला इतर आठ जणांनी महिला पोलिसाविरोधात अश्लील भाषेत कंमेंट लिहल्या. अत्यंत अश्लील भाषेत हीन दर्जाच्या कमेंट पाहिल्यानंतर संबंधीत पोलिस कर्मचारी महिलेनी शिवाजीनगर पोलिस ठाण्यात फिर्याद दिली.
कर्तव्य बजावणाऱ्या पोलिस महिलेला अशा पध्दतीने टिकेचे धनी व्हावे लागल्याने संताप व्यक्त केला जात आहे . गुन्ह्याचा पुढील तपास शिवाजीनगर पोलिस ठाण्याचे गुन्हे निरीक्षक विक्रम गौड करत आहेत.