हडपसर : गोडाऊनमध्ये घरगुती गॅसच्या टाकीतून दुसऱ्या टाकीत बेकायदेशीरपणे गॅस भरला जात होता. याचदरम्यान भीषण स्फोट झाला. या स्फोटात दोनजण गंभीर जखमी झाल्याची घटना घडली. मांजरी (ता. हवेली) ग्रामपंचायत हद्दीतील बेलेकर वस्ती परिसरात ही घटना घडली. याप्रकरणी हडपसर पोलिसांनी गोडावून मालकावर गुन्हा दाखल करून अटक केली आहे.
प्रेम राव शेख (वय ४७ , रा. हांडेवाडी, हडपसर) व रमेश रतन कुरुमकर (२९, रा. विघ्नहर्ता पार्क, गवळी वस्ती, मांजरी) असे जखमी झालेल्या दोघांची नावे आहेत. तर सुमित सुनील घुले (वय ४०, रा. वृंदावन सोसायटी, बेलेकर वस्ती, मांजरी) असे अटक करण्यात आलेल्या जागामालाकाचे नाव आहे.
पोलिसांनी दिलेल्या माहितीनुसार, सुमित घुले यांचे मांजरी येथे गोडावून आहे. या गोडावूनमध्ये भारत गॅस कंपनीच्या घरगुती गॅसच्या टाकीमधून दुसऱ्या टाकीत बेकायदापणे गॅस भरत होते. यावेळी अचानक स्फोट झाला. यावेळी प्रेमराव व रमेश हे दोघेजण गंभीर जखमी झाले. त्यांच्यावर मांजरी येथील एका खाजगी रुग्णालयात उपचार सुरु आहेत.
दरम्यान, याप्रकरणी गोडाऊन मालक सुमित घुले याच्यावर गुन्हा दाखल करण्यात आला असून, त्याला अटक करण्यात आली आहे. या प्रकरणाचा अधिक तपास पोलीस करत आहेत.
