पुणे : कात्रज घाटात नेत एका व्यक्तीने रिक्षा चालक महिलेकडे शारीरिक संबंधाची मागणी केली. महिलेने याला नकार दिल्यानंतर अंगावरील सर्व कपडे काढून या महिलेचा पाठलाग केल्याची धक्कादायक घटना पुण्यातील कात्रज घाटात घडली आहे.
ही घटना मंगळवारी (ता. २६) घडली आहे. याप्रकणी एका ३८ वर्षीय महिलेने भारती विद्यापीठ पोलीस ठाण्यात फिर्याद दिली. त्यानुसार प्रवाशी आरोपीला पोलिसांनी बेड्या ठोकल्या आहेत.
निखिल अशोक मेमजादे (वय 30, रा. शंकर मठ हडपसर) असे अटक करण्यात आलेल्या प्रवाशाचे नाव आहे.
पोलसांनी दिलेल्या माहिती नुसार, फिर्यादी या रिक्षा चालवून स्वतःचा उदरनिर्वाह करतात. मंगळवारी (ता.२६) डिसेंबरच्या रात्री त्या रिक्षा चालवत असताना आरोपी त्यांच्या रिक्षात प्रवासी म्हणून बसला. कात्रज घाटात जायचे असल्याचे सांगून त्याने तिकडे रिक्षा नेण्यास भाग पाडले. रात्री दहा वाजताच्या सुमारास कात्रज घाटातील अंधारातून रिक्षात जात असताना एका लॉजिंगच्या बोर्डजवळ त्याने रिक्षा थांबण्यास भाग पाडले.
त्यानंतर आरोपी फिर्यादी महिलेला जेवणासाठी बळजबरी करू लागला. फिर्यादी महिलेने त्याला नकार दिल्यानंतर आरोपीने तिच्या गालात चापट मारली आणि शारीरिक संबंधाची मागणी करू लागला. या अंधारात तुझ्या मदतीला कोणीही येणार नाही तुला काय करायचे ते कर” असे बोलून आरोपीने अंगावरील सर्व कपडे काढले आणि फिर्यादीच्या शेजारी बसला.
दरम्यान, या सर्व प्रकारामुळे फिर्यादी घाबरल्या आणि त्या रिक्षातून खाली उतरून पळू लागल्या. त्यानंतर आरोपीनेही नग्न अवस्थेत कात्रज घाटात फिर्यादींचा पाठलाग केला. याप्रकणी घाबरलेल्या महिलेने भारती विद्यापीठ पोलीस ठाण्यात फिर्याद दिली. त्यानुसार पोलिसांनी या प्रकरणी गुन्हा दाखल करून आरोपीला अटक केली आहे. या घटनेचा पुढील तपास पोलीस करीत आहेत.
