हडपसर : जुन्या वादातून 20 वर्षीय तरुणाला रस्त्यात अडवून लोखंडी हत्याराने कथित हल्ला केल्याची घटना हडपसर परिसरात घडली. या हल्ल्यात तरुण गंभीर जखमी झाला असून, हडपसर पोलिसांनी तिघांना अटक केली आहे.
मृणाल दीपक जाधव (वय 20, रा. संतोषनगर, कात्रज) असे जखमी झालेल्या तरुणाचे नाव आहे. या प्रकरणी पोलिसांनी ओमकार अनिल ताकवले (वय 19, रा. हडपसर), ओमकार सावंत (वय 19, रा. भेकराईनगर) आणि सिद्धार्थ मोरे (वय 30, रा. हडपसर) यांना अटक केली आहे.
पोलिसांनी दिलेल्या माहितीनुसार, मृणाल हा मित्रासोबत दुचाकीवरून जात असताना तिघांनी त्याला रस्त्यात अडविल्याचा आरोप आहे. मृणाल आणि आरोपींमध्ये पूर्वीपासून वाद असल्याचे पोलिसांनी सांगितले. त्याच वादातून आरोपींनी लोखंडी हत्याराने त्याच्यावर गंभीर वार केले आणि त्यानंतर लाथाबुक्क्यांनीही मारहाण केल्याचे तक्रारीत नमूद करण्यात आले आहे.
या हल्ल्यात मृणाल गंभीर जखमी झाला आहे. हडपसर पोलीस पुढील तपास करीत आहेत.
