पुणे: मद्यप्राशन केल्यानंतर जेवणाचे पैसे कोण देणार, यावरून दोन मित्रांमध्ये झालेला किरकोळ वाद विकोपाला गेला. संतापलेल्या मित्राने जवळच पडलेला दगड उचलून साथीदाराच्या डोक्यात घातल्याने त्याचा जागीच मृत्यू झाला. ही धक्कादायक घटना रविवारी (ता. ४) कात्रज-कोंढवा रस्त्यावरील गोकुळनगर येथील एअरकिंग वाईन्स दुकानासमोरील मोकळ्या जागेत घडली.
राजकुमार अंबाजी सनगुंडे (वय २५, रा. आंबेडकरनगर, आर. के. कॉलनी, कात्रज-कोंढवा रोड) असे मृत तरुणाचे नाव आहे. या प्रकरणी येवलेवाडी पोलिसांनी तुषार राजू वाल्हेकर (वय २९, रा. स्वामी समर्थनगर, गोकुळनगर) याला अटक केली आहे. मृत राजकुमार यांची बहीण सुदेवी आमरेश कांबळे (वय २९) यांनी येवलेवाडी पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, राजकुमार सनगुंडे आणि तुषार वाल्हेकर हे दोघेही चालक म्हणून काम करीत होते. त्यांच्यात चांगली ओळख होती आणि ते अनेकदा एकत्र असायचे. रविवारी दोघांनी एकत्र मद्यप्राशन केल्यानंतर गोकुळनगर परिसरातील चायनीज खाद्यपदार्थांच्या गाडीवर जेवण केले. जेवण झाल्यानंतर त्याच्या पैशांवरून दोघांमध्ये वाद सुरू झाला. सुरुवातीला झालेला शाब्दिक वाद काही वेळातच टोकाला गेला. यावेळी तुषार वाल्हेकर याने जवळच पडलेला दगड उचलून राजकुमार यांच्या डोक्यात जोरदार घाव घातला. डोक्याला गंभीर दुखापत झाल्याने राजकुमार यांचा घटनास्थळीच मृत्यू झाला.
घटनेची माहिती मिळताच येवलेवाडी पोलिस ठाण्याचे वरिष्ठ पोलिस निरीक्षक मारुती पाटील, पोलिस निरीक्षक दीपक करांडे, सहायक पोलिस निरीक्षक नेवसे आणि पोलिस उपनिरीक्षक विजय महाडिक यांनी घटनास्थळी धाव घेतली. पोलिसांनी तत्काळ कारवाई करत संशयित तुषार वाल्हेकर याला ताब्यात घेऊन अटक केली. या प्रकरणाचा पुढील तपास पोलिस निरीक्षक दीपक करांडे करीत आहेत.
