अहिल्यानगर: अहिल्यानगर जिल्ह्यात दारूच्या व्यसनावरून झालेल्या वादातून आई-वडिलांनी आपल्या 25 वर्षीय मुलाला लाकडी दांडक्याने मारहाण केल्याची धक्कादायक घटना समोर आली आहे. या मारहाणीत गंभीर जखमी झालेल्या तरुणाचा उपचाराअभावी दोन दिवसांनी मृत्यू झाला. त्यानंतर आई-वडिलांनी मुलाचा मृतदेह घरापासून सुमारे चार किलोमीटर अंतरावर असलेल्या शेतात नेऊन जाळल्याचा प्रकारही उघडकीस आला आहे. या घटनेने परिसरात खळबळ उडाली आहे.
प्रवीण प्रकाश लांडगे असे मृत तरुणाचे नाव आहे. प्रवीणला दारूचे व्यसन होते आणि तो आई-वडिलांसोबत राहत होता. त्यामुळे त्याच्या दारू पिण्यावरून घरात अनेकदा वाद होत असल्याची माहिती समोर आली आहे. मागील आठवड्यात प्रवीण दारू पिऊन घरी आल्यानंतर वडिलांचा संताप झाला. त्यानंतर आई-वडिलांनी त्याला लाकडी दांडक्याने मारहाण केली. या मारहाणीत प्रवीण गंभीर जखमी झाला.
गंभीर दुखापत झाल्यानंतरही त्याला रुग्णालयात उपचारासाठी नेण्यात आले नाही. आई-वडिलांनी त्याला घरातच ठेवले. दोन दिवस उपचार न मिळाल्याने प्रवीणचा मृत्यू झाला. त्यानंतर मुलाचा मृत्यू झाल्याचे लक्षात आल्यानंतर आई-वडिलांनी हा प्रकार इतरांना न सांगता मृतदेहाची विल्हेवाट लावण्याचा प्रयत्न केला. रविवारी पहाटेच्या सुमारास मृतदेह घरापासून सुमारे चार किलोमीटर अंतरावर असलेल्या स्वतःच्या शेतात नेण्यात आला. तेथे मृतदेह जाळण्यात आला.
या घटनेची माहिती पोलिसांना मिळाल्यानंतर त्यांनी घटनास्थळी जाऊन पंचनामा केला. शेतात पोलिसांना जळालेले अवशेष आणि हाडे आढळून आली. त्यानंतर पोलिसांनी आई-वडिलांची कसून चौकशी केली असता संपूर्ण प्रकार समोर आला. आई-वडिलांनी मुलाला मारहाण केल्याची आणि त्यानंतर मृतदेह जाळल्याची कबुली दिल्याचे एपीआय गणेश वारुळे यांनी सांगितले. या प्रकरणाचा पुढील तपास पोलिसांकडून सुरू आहे.
