पुणे: महाराष्ट्र लोकसेवा आयोगाच्या (MPSC) विविध मागण्यांसाठी पुण्यात सुरू असलेल्या विद्यार्थ्यांच्या आंदोलनाला आता पाच दिवस झाले आहेत. आंदोलनातील मागण्यांवरून विद्यार्थ्यांचे वेगवेगळे गट तयार झाले असून, प्रत्येक गटाकडून स्वतंत्र मुद्दे मांडले जात आहेत. त्यामुळे विद्यार्थ्यांच्या प्रश्नांसोबतच आंदोलनाला राजकीय रंग मिळत असल्याची चर्चा सुरू झाली आहे.
या आंदोलनाला विविध राजकीय नेत्यांनी भेट देत विद्यार्थ्यांशी संवाद साधला आहे. राष्ट्रवादी काँग्रेसचे आमदार रोहित पवार आंदोलनात सहभागी असून त्यांनी राज्य सरकारला 48 तासांचा इशारा दिला आहे. मागण्या मान्य न झाल्यास आंदोलन आणखी तीव्र होण्याची शक्यता त्यांनी व्यक्त केली. पुणे बंद किंवा मुंबईतील मंत्रालयावर मोर्चा काढण्यासारखी भूमिका घेतली जाऊ शकते, असेही त्यांनी म्हटले आहे.
दरम्यान, मनसे अध्यक्ष राज ठाकरे आज दुपारी 4 वाजता आंदोलनस्थळी विद्यार्थ्यांची भेट घेणार असल्याचे सांगण्यात आले आहे. त्यामुळे या भेटीकडेही लक्ष लागले आहे. याशिवाय इतर राजकीय नेत्यांनीही आंदोलनाला पाठिंबा दिल्याने परिसरातील राजकीय हालचाली वाढल्या आहेत.
MPSCमधील कथित गैरप्रकारांची चौकशी आणि आयोगाच्या अध्यक्षांच्या राजीनाम्याच्या मागणीवर सरकारने निर्णय घ्यावा, अशी मागणी सध्या करण्यात येत आहे. पुण्यातील आंदोलन सध्या विविध ठिकाणी सुरू असून परीक्षा पद्धती, आयोगाच्या कामकाजातील पारदर्शकता आणि अध्यक्षांच्या राजीनाम्यासह अनेक मुद्दे चर्चेत आहेत. त्यामुळे सरकार आणि विद्यार्थ्यांमधील पुढील चर्चा महत्त्वाची ठरणार आहे.
