पिंपरी: रिक्षातून प्रवास करणाऱ्या व्यक्तीला कोयत्याचा धाक दाखवून लुटल्याच्या प्रकरणाचा दक्षिण म्हाळुंगे एमआयडीसी पोलिसांनी अवघ्या 24 तासांत तपास लावला आहे. या कारवाईत पोलिसांनी 2 आरोपींना अटक केली असून, त्यांच्या एका अल्पवयीन साथीदारालाही ताब्यात घेतले आहे.
अटक करण्यात आलेल्या आरोपींची नावे अमन उर्फ शाहबाज समीर शेख (वय 26) आणि शेखर बापू माने (वय 21) अशी आहेत. या दोघांसोबत असलेल्या विधिसंघर्षित बालकालाही पोलिसांनी ताब्यात घेतले आहे. त्याला पुढील कायदेशीर प्रक्रियेसाठी बाल न्यायमंडळासमोर हजर करण्यात आले.
रिक्षातून प्रवास करणाऱ्या व्यक्तीला रस्त्यात अडवून कोयत्याचा धाक दाखवण्यात आला. त्यानंतर त्याच्याकडील वस्तू लुटण्यात आल्याची माहिती समोर आली. या घटनेनंतर पोलिसांनी आरोपींचा शोध सुरू केला.
विशेष म्हणजे, या प्रकरणात सुरुवातीला पोलिसांकडे आरोपींबाबत ठोस माहिती उपलब्ध नव्हती. त्यामुळे तपासाचे मोठे आव्हान पोलिसांसमोर होते. मात्र, पोलिसांनी तांत्रिक पद्धतीने विश्लेषण करत दोन्ही आरोपींना ताब्यात घेतले. त्यांच्यासोबत असलेल्या अल्पवयीन साथीदारालाही पोलिसांनी ताब्यात घेतले आहे.
