पुणे : राज्यातील विविध जिल्ह्याच्या पोलीस ठाण्याच्या हद्दीतून दुचाकी, व मोठ्या गाड्यांच्या बॅटऱ्यांची चोरी करणाऱ्या अट्टल चोरास गुन्हे शाखा युनिट ६ च्या पोलिसांनी जेरबंद केले आहे.
शुभम ज्ञानेश्वर जांभूळकर (वय-२४ रा. स.नं. १२ बुध्द विहार जवळ, बनसोडे चौक, लक्ष्मीनगर येरवडा पुणे, मुळ रा. अजिंठानगर आकुर्डी) असे अटक करण्यात आलेल्या चोरट्याचे नाव आहे. त्याच्याकडून पोलिसांनी ५ दुचाकी, १४ बॅट-या असा १ लाख ६९ हजार ५०० रुपयांचा मुद्देमाल जप्त केला आहे.
पोलिसांनी दिलेल्या माहितीनुसार, चंदननगर पोलीस ठाण्याच्या हद्दीत घडलेल्या गुन्ह्याचा तपास गुन्हे शाखा युनिट ६ चे पोलीस करीत होते. तपास करीत असताना अंमलदार यांना गुप्त बातमीदारांमार्फत माहिती मिळाली की, सदरचा गुन्हा रेकॉर्ड वरिल गुन्हेगार शुभम जांभूळकर याने केलेला असून तो डोमखेलवस्ती रोड जवळील मोकळे मैदानात वाघोली पुणे येथे थांबलेला आहे. व त्याच्याकडे असलेली दुचाकी गाडी ही सुध्दा चोरीची आहे.
मिळालेली माहिती वरिष्ठांना सांगून त्यांनी दिलेल्या आदेशानुसार सदर ठिकाणी सापळा रचून शुभम जांभूळकर यास ताब्यात घेतले. त्याचेकडे चौकशी केली असता त्याने गुन्हा केल्याची कबुली दिली. त्याच्याकडे अधिक चौकशी केली असता त्याने चंदननगर, हडपसर, लोणवळा, शिक्रापुर, व पाथर्डी अहमदनगर येथील प्रत्येक पोलीस स्टेशनच्या हद्दीतून प्रत्येकी १ वाहन चोरीकेल्याची कबुली पोलिसांना दिली.
दरम्यान, सदर आरोपीने वानवडी, हडपसर, सिंहगड रोड, उत्तमनगर, निगडी येथील प्रत्येकी ०१ बॅटरी चोरीचे व चाकण येथील ०२ बॅटरी चोरीचे गुन्हे केल्याची कबूली दिली आहे. तसेच पुणे आयुक्तालयातील एकूण ०४ व पिंपरी चिंचवड आयुक्तालयातील ०३ बॅटरी चोरीचे गुन्हे उघडकीस आले आहेत. असे एकूण १२ गुन्हे आरोपीकडून उघडकीस आणले आहेत. आरोपीकडून पोलिसांनी ५ दुचाकी, १४ बॅट-या असा १ लाख ६९ हजार ५०० रुपयांचा मुद्देमाल जप्त केला आहे.
सदरची कामगिरी गुन्हे शाखा युनिट ६ चे पोलीस निरीक्षक रजनीश निर्मल, पोलीस उपनिरीक्षक सुरेश जायभाय, भैरवनाथ शेळके, अंमलदार मच्छिंद्र वाळके, विठ्ठल खेडकर, कानिफनाथ कारखेले, प्रतिक लाहिगुडे, सचिन पवार, ऋषीकेश ताकवणे, ऋषीकेश व्यवहारे, ऋषिकेश टिळेकर, शेखर काटे, नितीन धाडगे, ज्योती काळे, अशफाक मुलाणी, व सुहास तांबेकर यांनी केली आहे.
