पुणे : पैशांवरून ऊसतोड मजुरांच्या ठेकेदाराला, त्याच्या पत्नी आणि आईला लाथाबुक्यांनी मारहाण करत ठेकेदाराचे अपहरण केल्याचा धक्कादायक प्रकार समोर आला आहे. याप्रकणी विमानतळ पोलिसांनी लगेच सुत्रे हलवत भिगवण पोलिसांच्या मदतीने ठेकेदाराची सुखरूप सुटका करून चार आरोपींना बेड्या ठोकल्या आहेत.
संदीप गुलाब चव्हाण (वय. २८), आकाश रमेश राठोड (वय.३५), निलकंठ बाबु आडे (वय. ३१), दिगंबर रमेश राठोड (वय. २८, सर्व रा. आळंद, जि. गुलबर्गा, कर्नाटक) अशी अटक केलेल्यांची नावे आहेत. याप्रकरणी बाळु घनशाम पवार (वय २५, रा. सोपाननगर, लोहगाव) यांनी विमानतळ पोलीस ठाण्यात तक्रार दिली आहे.
पोलिसांनी दिलेल्या माहितीनुसार, पवार हे रिक्षाचालक असून, त्यांनी तिघांकडून ऊसतोड मजूर पुरवितो, असे सांगून ७ महिन्यांपूर्वी साडेचार लाख रुपये घेतले होते. परंतु, त्यांनी मजूर पुरविले नाहीत, शिवाय पैसेही परत दिले नाहीत.
फिपवार बुधवार (ता.१८ ) जानेवारी रोजी जेवण करून घरी बसले होते. त्यावेळी चौघे आरोपी त्यांच्या घरात घुसले पवार यांना शिवीगाळ व मारहाण केली. तर त्यांच्या आई व पत्नीला घरात ढकलून देत मारहाण केली. त्यानंतर त्यांचे स्वीफ्ट कारमधून अपहरण केले.
त्यानंतर पवार यांच्या कुटूंबाने काही वेळात विमानतळ पोलीस ठाणे गाठून या घटनेची माहिती पोलिसांना दिली. त्यानंतर विमानतळ पोलीस ठाण्याचे वरिष्ठ निरीक्षक विलास सोंडे यांनी घटनेचे गांर्भिय ओळखत तपासाच्या सूचना दिल्या. तांत्रिक तपास सुरू करून आरोपींचा शोध सुरु केला. तेव्हा आरोपी पवार यांना घेऊन सोलापूर रोडने जात असून, यवतच्या पुढे गेल्याचे लक्षात आले.
दरम्यान, विमानतळ पोलिसांनी भिगवण पोलिसांना याची माहिती दिली. यानंतर यवत पोलिसांना रोडवल नाकाबंदी करण्यास सांगितले. विमानतळ पोलिसांनी भिगवणला पोहचत आरोपींना ताब्यात घेऊन ठेकेदाराची सुटका केली. या घटनेचा पुढील तपास पोलीस करीत आहेत.
