नाशिक : नाशिक जिल्ह्यात एक भीषण अपघाताची घटना घडली आहे. मुंबई-आग्रा महामार्गावर कार आणि आशयर ट्रकची जोरदार धडक झाली आहे. या अपघातात कारमधील ४ जणांचा जागीच मृत्यू झाला, तर आयशर चालक आणि क्लिनर गंभीर जखमी झाले आहेत. जखमींना उपचारासाठी रुग्णालयात दाखल करण्यात आलं आहे.
रहेमान सुलेमान तांबोळी (वय-४८) अरबाज चांदुभाई तांबोळी (वय-२१, दोघे. रा. लेखनगर सिडको) सीज्जू पठाण (वय-३८, रा. इंदिरानगर) अक्षय जाधव (वय-२४, रा. श्रध्दा विहार, इंदिरानगर) अशी अपघातात मृत्यू झालेल्यांची नावे आहेत. दरम्यान, अरबाज याचा महिनाभरपूर्वीच साखरपुडा झाला होता.
याबाबत मिळालेल्या अधिक माहितीनुसार, कोंबडी खत वाहतूक करणारा आयशर ट्रक मुंबई-आग्रा महामार्गावरून नाशिककडून आडगावच्या दिशेने सुसाट वेगाने जात होता. याचवेळी अचानक ट्रकचा टायर फुटला. काही क्षणातच ट्रक दुभाजकावर चढून थेट विरुद्ध बाजूच्या नाशिक लेनवर जाऊन कारवर धडकला.
या घटनेत कारमधील ४ जण जागीच ठार झाले, तर ट्रक चालक आणि क्लिनर गंभीर जखमी झाले आहेत. अपघाताची माहिती मिळताच पोलीस तातडीने घटनास्थळी दाखल झाले. या अपघातात कारचा अक्षरश: चक्काचूर झाला आहे. कारचा चेंदामेंदा झाल्याने नाशिक अग्निशमन दलाच्या जवानांकडून कारचा पत्रा कापून मृतदेह बाहेर काढण्यात आले.
पोलिसांनी दिलेल्या माहितीनुसार, मृत व्यक्तींचा भाजीपाला विक्रीचा व्यवसाय असल्याने हे सगळे जण देवळा तालुक्यातील सटाणा येथे गेले होते. तेथून नाशिकच्या दिशेने परतत असताना ही भीषण दुर्घटना घडली.
