पुणे : मोजणीच्या प्रकरणात भूकरमापकासह एका खासगी इसमाला लाचलुचपत प्रतिबंधक विभागाने हवेली उपाधीक्षक भूमीअभिलेख कार्यालातून बुधवारी (ता. २०) सायंकाळी सहा वाजण्याच्या सुमारास ताब्यात घेतले होते. ताब्यात घेतलेला भूकरमापक हा हवेली मोजणी कार्यालयात कार्यरत आहे.
दौलत मधुकर गायकवाड, (वय-३५, भू करमापक, भूमी अभिलेख कार्यालय, हवेली, पुणे) असे ताब्यात घेण्यात आलेल्या लोकसेवाकाचे नाव आहे, तर योगेश्वर राजेंद्र मारणे, (वय-२५, रा. मेंदळ गॅरेज) असे खासगी इसमाचे नाव आहे. या दोघाविरुद्ध येरवडा पोलीस ठाण्यात गुन्हा दाखल करण्यात आला आहे.
लाचलुचपत प्रतिबंधक विभागाने दिलेल्या माहितीनुसार, तक्रारदार यांची देहुगाव येथे जमीन आहे. त्या जमिनीच्या मोजणीसाठी व क्षेत्राची हद्द ठरवून घेण्यासाठी आरोपी लोकसेवक दौलत गायकवाड यांनी एका खासगी इसमामार्फात तक्रारदार यांच्याकडे ४ लाख रुपये लाचेची मागणी केली होती. याप्रकरणी तक्रारदार यांनी लाचलुचपत प्रतिबंधक विभाग पुणे येथे तक्रार दिली होती.
त्या तक्रारीवरून लाचलुचपत प्रतिबंधक विभागाकडून चौकशी केली असता खासगी इसम योगेश्वर मारणे याने दौलत गायकवाड यांच्या सांगण्यावरून तक्रारदार यांची जमीन मोजणीसाठी व क्षेत्राची हद्द ठरवून घेण्यासाठी ५० हजार रुपये तक्रारदार यांचेकडून घेतल्याचे निष्पन झाले. मारणे आणि गायकवाड या दोन आरोपींना ताब्यात घेण्यात आले असून त्यांच्याविरुद्ध येरवडा पोलीस ठाण्यात गुन्हा दाखल करण्यात आला आहे.
पुढील तपास पोलीस निरीक्षक श्रीराम शिंदे करत आहेत. ही कारवाई पोलीस अधीक्षक अमोल तांबे, अपर पोलीस अधीक्षक शीतल जानवे यांच्या मार्गदर्शनाखाली पुणे लाचलुचपत प्रतिबंधक विभागाने केली.
