सांगली: महाराष्ट्र राज्यात लोकसभेला ४८ मतदारसंघात महायुतीविरुद्ध महाविकास आघाडी अशी थेट लढत होती. या निवडणुकीच्या निकालात राज्याने महाविकास आघाडीच्या बाजूने लोकांनी कौल दिला आहे. तर महायुतीला मोठा फटका बसला आहे. दरम्यान महाविकास आघाडीमध्ये सांगलीच्या जागेवरून मोठा वाद रंगला होता. याठिकाणी काँग्रेसकडून इच्छुक असलेल्या विशाल पाटील यांना डावलून महाविकास आघाडीने चंद्रहार पाटलांना उमेदवारी दिली होती.
शिवसेना -उद्धव बाळासाहेब ठाकरे पक्षाचे नेते उद्धव ठाकरे यांनी सांगलीमध्ये येऊन चंद्रहार पाटलांची उमेदवारी घोषित केली. त्यामुळे काँग्रेसचे स्थानिक नेते आणि पदाधिकारी नाराज झाले. त्याचे रुपांतर विशाल पाटील यांच्या बंडखोरीत झाले. विशाल पाटील यांनी अपक्ष उमेदवारी अर्ज भरत निवडणुकीत भारतीय जनता पक्षाविरोधात दंड थोपटले आणि त्यात ते विजयीही झाले आहेत. त्या ठिकाणी भारतीय जनता पक्षाचे संजयकाका पाटील आणि मविआचे उमेदवार चंद्रहार पाटील यांचा पराभव झाला आहे.
विशाल पाटील यांना ५ लाख ५ हजार मते, संजयकाका पाटील यांना ४ लाख २० हजार मते तर महाविकास आघाडीचे उमेदवार चंद्रहार पाटील यांना केवळ ५५ हजार मते पडली आहेत. या निवडणुकीत अपक्ष उमेदवार विशाल पाटील यांनी दोन्ही उमेदवारांचा मोठा पराभव केला. निवडणुकीची मतमोजणी सुरु झाल्यापासूनचे विशाल पाटील यांनी आघाडी घेतली होती.
या विजयानंतर बोलताना विशाल पाटील म्हणाले की, अनेक काँग्रेस नेत्यांनी जाहीरपणे माझा प्रचार केला. दिवंगत नेते पतंगराव कदम यांना मानणारा मोठा गट हा माझ्या पाठीशी खंबीरपणे उभा होता. त्यांनीच मला मोठं मताधिक्य मिळवून दिले. तसेच आर.आर पाटील यांच्या मतदारसंघातही मला मताधिक्य असून त्यांचे आशीर्वाद माझ्यासोबत होते, असं देखील त्यांनी सांगितले.
पुढे बोलताना पाटील म्हणाले, हा विजय जनतेचा आहे. ज्या लोकांनी माझ्यासाठी काम केले, त्यांना मोठ्या प्रमाणावर त्रास दिला गेला. या लोकांच्या पाठीशी ठामपणे मी उभा आहे. ज्यांनी मला मतदान केले नाही, त्यांच्याबाबत कोणताही आकस नाही. मी सांगली लोकसभा मतदारसंघातील प्रत्येक व्यक्तीचा खासदार म्हणून लोकसभेत काम करणार आहे, असंही विशाल पाटील यांनी स्पष्ट केले.
