पिंपळनेर : धुळे जिल्ह्यात महाराष्ट्राला लाज आणणारी घटना घडली आहे. पिंपळनेर येथे बैल मार्केटमध्ये उंभर्टी येथील मजुरीकाम करणाऱ्या ३९ वर्षीय विवाहितेवर सामूहिक बलात्कार केल्याची धक्कादायक घटना समोर आली आहे. या घटनेनंतर फरार झालेल्या संशयित आरोपींना पिंपळनेर पोलिसांनी एका तासाच्या आत बेड्या ठोकल्या आहेत.
याप्रकरणी विवाहित महिलेने पिंपळनेर पोलिस ठाण्यात फिर्याद दिली आहे. त्यावरून पोलिसांनी गुन्हा दाखल करून आरोपींना अटक केली आहे. निलेश सतीश निकम (वय-३२) व स्वप्निल शिवाजी वाघ (वय-२६) संशयित आरोपींची नावे आहेत.
पिंपळनेर पोलिसांनी दिलेल्या माहितीनुसार, मी आणि माझा मुलगा नेहमीप्रमाणे सटाणा येथील कांदा व्यापाऱ्याकडे मजुरीसाठी गेलो होतो. रविवारी (ता.२६) सटाणा येथील काम उरकून सायंकाळी सहा वाजण्याच्या सुमारास रिक्षाने घरी जाण्यासाठी निघालो आणि रात्री आठच्या सुमाराम पिंपळनेर बसस्थानकात उतरलो.
मात्र, पिंपळनेर तेथून गावी जाण्यासाठी बस नसल्याने मी आणि मुलाने बसस्थानकात काहीवेळ बस ची वाट पहिली. बस मिळाली नाही म्हणून सामोडे चौफुली येथे खासगी वाहनाची प्रतीक्षा करीत असताना रात्री अकरा वाजण्याच्या सुमारास पिंपळनेर बसस्थानकाच्या दिशेने पांढऱ्या रंगाचे पिकअप वाहनातून आलेल्या दोघांनी मला आणि माझ्या मुलाला जबरदस्तीने बैल बाजारातील मैदानावर नेले. तसेच मुलाला दमबाजी करत मारहाण करत माझ्यावर अत्याचार केला, असं फिर्यादीत म्हटले आहे. पुढील तपास पोलीस करत आहेत.
