मालेगाव : अवकाळी पावसामुळे नाशिक आणि मालेगावचा पारा घसरला आहे. रविवारी (दि. १२) मालेगावी कमाल ३८.८ तर नाशिकमध्ये ३४.१ अंश सेल्सिअस तापमानाची नोंद झाली. दरम्यान, गेल्या आठवडाभरापासून मालेगावचा पारा ४२ ते ४३ अंशांवर स्थिरावला होता. त्यामुळे नागरिकांना उकाडा सहन करावा लागत होता. रविवारी मालेगाव शहरात पहाटे तीन वाजेच्या सुमारास झालेल्या अवकाळीने पार घसरला आहे. दिवसभर परिसरात कमी-अधिक प्रमाणात गारवा जाणवत होता. याशिवाय शहर व परिसरात झालेल्या पावसामुळे १४ तासाहून अधिक काळ वीजपुरवठा खंडित राहिल्यामुळे नागरिकांनी संताप व्यक्त केला.
