बुलढाणा : बुलढाणा शहरामध्ये एक धक्कादायक घटना घडली आहे. डीजेच्या दणदणाटामुळे चवताळल्या मधमाशांनी थेट वऱ्हाडी मंडळींवर हल्ला केल्याची घटना घडली आहे. मधमाशांच्या हल्ल्यात 10 वऱ्हाडी मंडळी जखमी झाले आहेत. ही घटना बुलढाणा शहरातील जाभरूण रोड परिसरात सोमवारी (ता. 29) दुपारच्या सुमारास घडली आहे.
सुभाष गवई, पंकज गवई, राजू गवई, माया जाधव, रमाबाई जाधव, बबन जाधव, अवंती वावळे, मायाबाई झिने, सौरभ हिवाळे, सागर जाधव, राजू वाहुळे अशी जखमींची नावे आहेत. जखमींनी उपचारासाठी रुग्णालयात दाखल करण्यात आले आहे.
नेमकं काय घडलं?
सोमवारी लग्नसमारंभाचा कार्यक्रम उरकल्यानंतर वऱ्हाडी मंडळींनी नवरदेवाची वरात काढली. वरातीत डीजे फूल आवाजात सुरू होता. डीजेच्या तालावर वऱ्हाडी मंडळी बेधुंद होऊन नाचत होते. दरम्यान, डीजेच्या दणदणाटामुळे एका झाडावर असलेल्या मधमाशांना प्रचंड त्रास झाला. अख्खा मधमाशांचा गट उटला आणि त्यांनी थेट उपस्थित वऱ्हाडी मंडळींवर हल्ला करण्यास सुरुवात केली. अचानक मधमाशा आल्याने वऱ्हाडी मंडळींची चांगलीच धावपळ उडाली. दिसेल त्या वाटेने वऱ्हाडी मंडळी पळत सुटले.
