सांगली : नागपूर-रत्नागिरी महामार्गावर भीषण अपघात झाला आहे. या अपघातात चार मजुरांचा जागीच मृत्यू झाला, तर दहाजण गंभीर जखमी आहेत. ऊसतोडणीचे काम संपवून घराकडे परत जात असताना काही मजुरांना ट्रकने धडक दिली. या धडकेत चार मजुरांचा जागीच मृत्यू झाला आहे.
ऊसतोडणीचे काम संपवून घराकडेपरत जात असताना रस्त्यालगत थांबल्यानंतर पाठीमागून आलेल्या ट्रकने जोरदार धडक दिली. यामध्ये मजुरांसह चौघांचा जागीच मृत्यू झाला, तर तब्बल 10 जण गंभीर जखमी झाले आहेत. मृतांमधील तीनजण चिखलगीचे, तर एकजण शिरनांदगीचा रहिवाशी असल्याची माहिती मिळत आहे.
सदरचा अपघात हा नागपूर-रत्नागिरी महामार्गावर कवठेमंकाळ तालुक्यातील नागज फाट्याजवळ मध्यरात्री दोन वाजताच्या दरम्यान झाला. याबाबत सविस्तर माहिती अशी की, मंगळवेढा तालुक्यातील काही भागात रोजगाराचे साधन उपलब्ध नसल्यामुळे लोकांना रोजगारासाठी ऊस तोडणीचा पर्याय निवडावा लागत आहे. त्यासाठी सांगली, सातारा आणि कोल्हापूर या ठिकाणी जावे लागते. येथील काही ऊसतोड मजूर गुरुदत्त सहकारी साखर कारखाना शिरोळ या ठिकाणी ऊसतोडणीसाठी गेले होते. त्यातील काही मजूर यंदाचा गळीत हंगाम संपवून आपल्या गावाकडे परत जात होते. दरम्यान प्रवास करत असलेल्या ट्रॅक्टरमध्ये मध्यरात्री दोन वाजता बिघाड झाला, त्यामुळे ट्रॅक्टर रस्त्याच्या बाजूला उभा करुन दुरुस्त केला जात होता. तेवढ्यात पाठीमागून आलेल्या ट्रकने ट्रॅक्टरला जोरदार धडक दिली.
या अपघातात शालन दत्तात्रय खांडेकर (वय 30 रा. शिरनांदगी), जगमा तम्मा हेगडे (वय 35), दादा आप्पा ऐवळे (वय 17), निलाबाई परशुराम ऐवळे (रा. चिक्कलगी) यांचा जागीच मृत्यू झाला. तसेच इतर 11 मजूर जखमी झाले आहेत. जखमींना उपचारासाठी कवठेमहांकाळ आणि मिरज या ठिकाणी भरती केले आहे. या अपघाताची माहिती मिळताच चिक्कलगी आणि शिरनांदगी या गावावर शोककळा पसरली आहे.
