नागपूर : विधवा महिलेला लग्नाचे आमिष दाखवून तिचे लैंगिक शोषण केल्याची घटना नागपूरमध्ये घडली आहे. ही घटना यशोधरा नगर पोलिस ठाण्याच्या हद्दीत उघडकीस आली. याप्रकरणी पोलिसांनी पीडित ३५ वर्षीय महिलेच्या तक्रारीवरून गुन्हा नोंदवला. पोलिसांनी आरोपीला तात्काळ अटक केली आहे. सचिन महादेव येवले (३७ रा. यशोधरानगर) असे अटकेतील आरोपीचे नाव आहे.
सहा वर्षांपूर्वी पीडित महिलेच्या पतीचे निधन झाले. पीडिता खासगी संस्थेत काम करून स्वत:चा आणि दोन मुलांचा उदरनिर्वाह करते. जुलै २०२१ मध्ये पीडितेची सचिनशी फेसबुकवर ओळख झाली. सचिनने तिला प्रेमाच्या जाळ्यात अडकवले. सचिन विविध संस्थांमध्ये त्याची गाडी भाड्याने लावतो.
फेसबुकवरील ओळखीनंतर त्यांने पीडितेशी आणखी संबंध वाढवले. लग्न आणि तिच्या मुलांचा सांभाळ करण्याचे आश्वासन त्याने तिला दिले. या दरम्यान विविध हॉटेलमध्ये नेऊन पीडितेचे लैंगिक शोषण केले. काही दिवसांपूर्वी पीडितेने लग्नासाठी दबाव टाकला असता आरोपी शिवीगाळ करून धमकावू लागला. त्याने लग्न करण्यास स्पष्ट नकार दिला. पीडितेने पोलिसात तक्रार केली. पोलिसांनी विविध कलमान्वये गुन्हा नोंदवून सचिनला अटक केली.
