वाशिम : समृद्धी महामार्गावर १ फेब्रुवारी मध्यरात्रीच्या सुमारास एक भीषण अपघात झाला आहे. भरधाव वेगात असलेल्या खासगी बसवरील चालकाचे नियंत्रण सुटल्याने बस थेट महामार्गावरच उलटली आहे. हा अपघात वाशिमच्या कारंजा तालुक्यातील डोनद लोकेशन १७३ जवळ घडला आहे. या अपघातात १५ प्रवासी जखमी झाले आहेत. जखमींना कारंजा येथील रुग्णालयात उपचारासाठी दाखल करण्यात आलं आहे. काहींची प्रकृती चिंताजनक असल्याची प्राथमिक माहिती आहे.
पोलिसांनी दिलेल्या माहितीनुसार, अपघातग्रस्त बस नागपूर येथून पुण्याच्या दिशेने जात होती. वाशिमच्या कारंजा तालुक्यातील डोनद लोकेशन १७३ जवळ बस आली असता, चालकाचे बसवरील नियंत्रण सुटले. काही क्षणातच बस महामार्गावरच उलटली. या भीषण अपघातात बसचा समोरील भाग अक्षरश: चक्काचूर झाला आहे. या अपघातात कुठलीही जीवितहानी झाली नाही. मात्र, बसमधील १५ प्रवासी जखमी झाले आहेत.
अपघाताची माहिती मिळताच महामार्ग पोलिसांनी घटनास्थळी धाव घेत बचावकार्य सुरू केले. जखमींना कारंजा येथील रुग्णालयात उपचारासाठी दाखल करण्यात आले आहे. जखमींपैकी ५ ते ६ जणांची प्रकृती गंभीर असल्याची प्राथमिक माहिती मिळत आहे. समोरून जात असलेल्या ट्रकचालकाने अचानक ब्रेक दाबल्यामुळे बसचालकाचे बसवरील नियंत्रण सुटले. त्यामुळेच हा अपघात झाला असल्याची प्राथामिक माहिती पोलिसांनी दिली आहे.
